ⅬⅩⅥ
Ogoteera gw’okoiraneria ng’a mbuya mono
(Ogoteera gwa Daudi, ase omoteria)
Ⅰ Inwe abanto b’ense yonsi,
aka eriogi ri’omogooko ase Nyasae;
Ⅱ terera obonene bw’erieta riaye,
moe obonene ase okomotogia!
Ⅲ Motebie Nyasae: Naki ogokora kwao kore ogw’okwoboyia!
Obobui bwao nigo bore obonene mono,
goika ababisa bao bekeyie asore.
Ⅳ Ense engima nigo ekogosasiima na kogotogia,
abanto bonsi nigo bagotera na gotogia erieta riao.
Ⅴ Inchuo morore aya Nyasae akorire.
Aya akorire ase egati ya Mwanyabaanto nigo are ay’okwoboyia.
Ⅵ Ere akaonchora enyancha ekaba ense enyomo,
erio abanto bakambokera aroro namagoro.
Aroro agwo tokagoka mono asare.
Ⅶ Omonene nere okogamba ase okobua kwaye kare na kare;
amaiso aye nigo arigereretie ebisaku bionsi,
ase igo abasaria tibaabaisa kweimokereria igoro.
Ⅷ Inwe abanto b’ebisaku bionsi, motogie Nyasae oito,
tiga eriogi ri’okomotogia riigweke.
Ⅸ Omonene nere otorendete tore moyo,
tatotigeti totererigwe amagoro.
Ⅹ Aye Nyasae gwatoteemire,
ee, gwatoteemire buna efeta egoteemwa ase omorero.
Ⅺ Nigo gwatotigete tokagwa ase egesibo
aye nigo gwatotwegete egurube endito.
Ⅻ Aye nigo kwarentete ababisa baito bagatotacha emetwe.
Intwe nigo twaetete ime y’omorero na amaache,
korende nonya nabo, ogatorusiao, ogatobeka ase obuya obonge bore.
ⅩⅢ Ninchiche ase enyomba yao, indetane ekeng’wanso ki’ogosambwa.
Ning’ikeranie chiira nakorierete ase ogotiana,
ⅩⅣ chiira chiria nakwanete nomonwa one,
echio nariete ekero narenge ase emechando.
ⅩⅤ Ninkorentere ching’iti chire chinoru chibe ebing’wanso bi’ogosambwa,
ninchirue amo nekeng’wanso gie chimingichi kere ne rimisu rigiya.
Nindue ne chieri ne chimbori chibe ebing’wanso.
ⅩⅥ Inwe mwensi abamoirogete Nyasae, inchwo moigwe,
nainche nimbatebie ay’Omonene ankoreire.
ⅩⅦ Inche nigo narerete neriogi rinene asare,
na ogotogigwa kwaye nigo kwarenge ase oromeme rwane.
ⅩⅧ Onye nabete ndengereretie amabe ase enkoro yane,
Omonene anga tantegererete.
ⅩⅨ Korende ekeene, Nyasae ontegereire;
ee, oigure eriogi ri’ogosaba kwane.
ⅩⅩ Nyasae atogigwe,
ekiagera tangeti koigwa ogosaba kwane,
gose tarusetie korwa asende obwanchani bwaye bogendererete botambe.