ⅬⅩⅩⅩⅥ
Ogosaba gw’okonyora ogokonywa ekero ki’ogochandwa
(Ogosaba gwa Daudi)
Ⅰ Aye Omonene, integerera, onyigwe na ong’iranerie,
ekiagera nigo inde omotaka na omoremerwa.
Ⅱ Orende omoyo one, ekiagera nigo nkoirogete;
aye Nyasae one, intoorie inche omosomba oo,
ekiagera nigo ngosemeretie.
Ⅲ Aye Nyasae, indorera amaabera,
ekiagera nigo nkorera asore omobaso boira.
Ⅳ Gokia omoyo one inche omosomba oo,
ekiagera narentire omoyo one asore aye Omonene.
Ⅴ Omonene, aye nigo ore omuya na oyo okwabera;
nigo okoorokia obwanchani obonge ase abagokorangeria obakonye.
Ⅵ Omonene, tegerera oigwe ogosaba kwane,
igwa ekerero ki’ogosorora kwane.
Ⅶ Ekero inde nemechando nigo ngokorangeria,
ekiagera aye nigo okonyigwa na kong’iraneria.
Ⅷ Omonene, enyasae teri enga buna aye,
gose emeremo ende teri enga buna eyao.
Ⅸ Ebisaku bionsi gwatongete mbichiche,
bitung’ame ase obosio bwao kogosasiima,
mbitogie erieta riao, aye Omonene.
Ⅹ Aye naye ore omonene, nigo ogokora amakumia;
aye naye bweka ore Nyasae.
Ⅺ Aye Omonene, inyorokererie enchera yao,
nigo nganetie kobwatia ekeene kiao; renda enkoro yane, erinde inyiroke erieta riao.
Ⅻ Aye Omonene Nyasae one,
nigo nkoiraneria ng’a mbuya mono nenkoro yane yonsi,
nindarie obonene bw’erieta riao goika kare na kare.
ⅩⅢ Naki obwanchani bwao bogendererete botambe nigo bore obonene ase ’nde;
aye kwabooririe omoyo one korwa aase abakuure.
ⅩⅣ Nyasae, abanto abaenenu banyimokeire kondwania esegi;
ekeombe ki’abaanto abatindi nigo bakorigia basirie obogima bwane,
abwo tibakoirogeti nonya ng’ake.
ⅩⅤ Korende aye Omonene nigo ore Nyasae bw’amaabera na obuya;
tori omwango bw’okoba nendamwamu,
nigo ore nobwanchani botari koera, na obwegenwa.
ⅩⅥ Ing’iranerie na ondorere amaabera,
ong’e inche omosomba oo chinguru chiao,
intoorie inche omwana bw’omosomba oo omokungu.
ⅩⅦ Inyorokie ekemanyererio ki’obuya bwao,
erinde abanto bangechete bakerore na gosookigwa,
ekiagera aye Omonene gwankonyire na kondemia.