ⅩⅭⅡ
Ogoteera kw’ogotogia Nyasae
(Ogoteera gw’Esabato)
Ⅰ Nigo ere buya gokoakera aye Omonene Nyasae ng’a mbuya mono,
na goteera ase ogotogia erieta riao, aye Nyasae Ore Igoro Mono.
Ⅱ Kera emambia nigo ere buya koraria obwanchani bwao bogendererete botambe,
na kera obotuko koraria obwegenwa bwao,
Ⅲ ase okobugia obokano bore ne chinga ikomi,
na amakano ande are namariogi amaya.
Ⅳ Aye Omonene, ogokora kwao nigo kongogetie;
ninchenge ase engencho y’emeremo y’amaboko ao.
Ⅴ Aye Omonene, emeremo yao nigo ere emenene mono,
na ebirengererio biao nigo bire ebia ime mono.
Ⅵ Omonto omoriri takonyara kobimanya,
na oyo otari nobong’aini takonyara komanya amang’ana buna ayio.
Ⅶ Abakori amabe nabaisa koreereta buna obonyansi,
na abakori ebibe bonsi babe bagosicha buya,
korende omoerio obo nogosirigwa goika kare na kare.
Ⅷ Aye Omonene, nigo ore omonene mono kare na kare.
Ⅸ Aye Omonene, Naama! Ababisa bao mbasirigwe;
na abakori ebibe bonsi mbasiarerwe gochia aande onsi.
Ⅹ Gwakinirie orogunchara rwane rwabeire buna orw’eng’era,
kwang’umoreire amaguta amayia.
Ⅺ Narorire namaiso aane ababisa baane bakobugwa,
naigure namato aane igoro y’abakori amabe abanyimokerete.
Ⅻ Omonyene oboronge naseboke buna omokendo,
nakine buna omocharake o Lebanoni.
ⅩⅢ Abwo basimekire ase enyomba y’Omonene,
nigo baragenderere koreereta ase chigoora chia Nyasae oito.
ⅩⅣ Abwo nigo bakogenderera goseboka nonya bagotire,
nigo baragenderere kobesea.
ⅩⅤ Ayio nigo akworokia ng’a Omonene nigo are omonyene oboronge,
ere nere egetare kiane, na obokorekanu tibori ime yaye.