Ⅰ Omogambi ore n’echisemi nigo agosomia abanto baria akogambera n’obogambi bw’omonto ore n’echisemi nigo bore n’omoroberio omuya. Ⅱ Buna omogambi bw’abaanto are naboigo n’abanto baye bare. Nonya mbaria bakombwatisia ase obogambi bwaye; buna omogambi are n’abamenyete aroro bare igo. Ⅲ Omogambi otari n’echisemi nigo are emechando ase abanto baye; obogambi nigo bogokiina na gotenena bokong’u ekero abagambi baye bare abang’aini. Ⅳ Obogambi bw’ense nigo bore ase amaboko a Nyasae nere nigo akomobeka omogambi oisaine ase engaki yaye. Ⅴ Oboikeranu bwa Mwanyabaanto nigo bore ase amaboko a Nyasae. Omonene nigo akomoa omoriki amasikani. Ⅵ Tobaisa kogechigwa n’omwamate oo. Gose tokora kende ekero gwatokeirwe n’oboro. Ⅶ Obwerori nigo bokogechia Nyasae, na mwanyanto boigo; amang’ana y’okwamereria n’echinguru chitari chia boronge ekio n’egento giokogechia ase bonsi babere. Ⅷ Ase engencho y’aya atari aboronge, nakwo ogoteeba, obwerori na gwancha enibo, obogambi bw’ense eyemo ’na boirwe n’ense ende. Ⅸ Inee, omonto oyio ere ore ebuse n’eribu, ninki igo arerorere? Ⅹ Oborwaire bw’engaki entaambe nigo bokomwoboyia omogwenia reero, na mambia omogambi, erio abwo bakwa bonsi baba ebitondo. Ⅺ Aria akobanyora ekero bakuure bonsi abwo nigo bare egento ekemo: amakonde, ching’iti chintindi chintindi, amo n’ebigwankwa. Ⅻ Omochakano bw’obwerori n’okomotiga Omonene na goonchora omoyo oye aare korwa ase Omonene n’omotongi. ⅩⅢ Ekiagera omochakano bw’obwerori n’ekebe, na monto onde bwensi orabwatane nakio, oyio nigo araichorwe n’obobe. ⅩⅣ Nyasae obaikirie abanene korwa ase ebirogo biabo bi’obonene, n’eribaga riabo obaikaransirie abaitongo. ⅩⅤ Nyasae obasebareranirie aberori korwa ase oboroso bwabo; nase ribaga riabo oikaransirie abaitongo. ⅩⅥ Omonene Nyasae ong’usire ebisaku bionsi bi’ense, na kobisiria goika omoerio bw’ense. ⅩⅦ Ebisaku binde obirusirieo na kobisiria, erio obotinyirie ebimanyerio biabo bionsi korwa ase ense. ⅩⅧ Obwerori tibwatongetwe okoba abanto, gose okoba Mwanyabaanto. ⅩⅨ Mbitongire ki ebio igo bisaine amasikani? ’Mwanyabaanto? Mbitongire ki bisanerete ogosikwa? ’Mwanyabaanto? Mbaria bamomanyete Nyasae. Mbitongire ki bisanerete ogosikwa? ’Mwanyabaanto. Mbitongire ki bisanerete amasikani? Mbarabi bakobuna amachiiko? ⅩⅩ Gati abamura bamwabo omomura omonene nere ogwenerete gosikwa. Baria bamoirogete Nyasae mbagwenerete amasikani bosio bwaye. ⅩⅫ Abatenenku, nigo bagosikwa bosio bw’abataka, korende abataka tiga bamwetogerie Nyasae. ⅩⅩⅢ Tari buya gosiereria omonto ore omotaka korende nabwate obong’aini, nonya nabo teri buya kogokera omonyabibe. ⅩⅩⅣ Omogambi, na omonachi ebina oyio obwate ekerogo oyio nigo agosikwa, korende oyo omoirogete Nyasae n’omonene kegima kobua bonsi abwo. ⅩⅩⅤ Omorikwa emeremo ore n’echisemi nakorerwe emeremo n’abanto bare n’obosibore; n’oyore n’obong’aiani takomwemurunganeria. ⅩⅩⅥ Tobaisa gwekora kemanyi ekero ogokora emeremo yao, gose gwetogia ekero obwate obokong’u. ⅩⅩⅦ Nigo are buya oyore n’omokia ase emeremo, oyio nigo abwate kera eki aganetie, kobua omonto okona goetaanana erio ochaka kweng’ereria ase abande ng’a tari n’endagera. ⅩⅩⅧ Omwana one, etogerie ogwekeyia, na bwerore aye bweka koba ng’a toisaini. ⅩⅩⅨ Ekero omonto agwekora omotaka, bweka kobwaye, ning’o otamorore koba omonto omoriri? Omonto buna oyio ning’o oramosike, ekiagera bwesiererie ere omonyene? ⅩⅩⅩ Ekero ore omonto omotaka torigosikwa ase obong’aini bwao; n’omotenenku ase obotenenku bwao. ⅩⅩⅪ Onye omonto osikire nonya n’ekero are omotaka, oyio nabo agokwa mono kegima ekero abeire omokama.