Ⅰ Eisa koba Ng’a oyore n’omogooko noria bweka ore n’echisemi, rirorio oyio nare n’engencho yogwetogia, naende erio nabo araikaranse n’abanto b’engencho, na korengerigwa koba omonto ogwenerete ase abande. Ⅱ Totogia momura kieni ’motogi nkoro, gose tosiereria omonto ase ekieni kiaye gioka. Ⅲ Enchoke n’eyemo ase ebitongire biria ebike bikoiruruka, korende eke gekonyorekana korwa ase emeremo yabo n’egiansu mono kegima. Ⅳ Tibwetogia ekiagera obegete eanga amaritati, kogunkwara ekero kwairwe amasikani. Oise kogunkwara, Nyasae ngokora are ebikone bi’ogokumia. Ⅴ Abagaambi abange bakoreire emeremo yabo ase aabe, baikaransete, erio chigutwa chiabo chi’obogambi chibeekire n’abanto batana komanyekana. Ⅵ Abanto baria abanene-abanene baagoranirwe kegima, abanene abange babekirwe chinchera gati-gati y’abanto bande. Ⅶ Tobaisa kogosia omonto otaramoitona, rengereria ritang’ani, erio omanye komomochia. Ⅷ Kwarategerera ritang’ani erio kwamanya koiraneria, gose tong’aina onde ekero ogokwana. Ⅸ Tiga gwesoia ase abande n’amang’ana atakorengeti; tiga gwesoia ase eriomana ri’abanyabibe. Ⅹ Omwana one, tiga gwechandera amang’ana amaange bosa; riika riaigo, ementere emeremo erio onyare kwebachera emetego yokomochigwa bosa. Notaka kobwatia amang’ana amaange tokoyaikeria, gose tokonyara koyabogerera ase ogotama gwoka. Ⅺ Abanto bande nigo bagokora emeremo ase omokia omonene kegima, korende omoerio oye banyora ng’a nigo bakonakoirana magega kera engaki. Ⅻ N’abande mbareo batari gokora emeremo yabo ase omokia, abwo baganetie ogokoonya, mbari nagento na nigo baikaranseire n’obotaka. Korende, abwo Omonene Nyasae nigo akobarigereria n’amaabera na kobaimokereria igoro; ⅩⅢ nigo akobatura na kobaa chinguru erio babe n’enibo. Nonya n’abanto nigo bagochia kobarora goika babakumia kegima. ⅩⅣ Amaya n’amabe, obogima n’amakweri, obotaka amo n’obokama ebio bionsi nigo bikorwa ase Nyasae. ⅩⅤ Chisemi, okoigwa okomanya ekerage, obwanchani n’ogokora okuya, ebio bionsi nigo bikorwa ase Nyasae. ⅩⅥ Obobe nomosunte nigo biamenyete nabanyabibe korwa omochakano, na baria bakogokera ebibe nigo baragende nabirobio goika obogotu bwabo. ⅩⅦ Ebigeni bikorwa ase Nyasae igo bire ebiegwa bia kare na kare ase baria bamoirogete. Obuya bwa Nyasae nigo borabeo na kobaraa goika kare na kare. ⅩⅧ Abanto abange nigo bakoba abakama* kobua mono goetera ase ogokora emeremo ase omokia amo n’echinguru, korende eng’eria yabo nero eye; ⅩⅨ nonya bagoteeba ng’a: “Bono ninyare gotimoka na kogokera eng’eria nanyorire,” tibamanyeti ng’a nengaki eng’a ki erabeo; ekiagera nigo barakwe batigere abanto bande enibo yabo. ⅩⅩ Aye bwata emeremo yao erio ogote kore ase emeremo yao. ⅩⅪ Tobaisa kororera omonyabibe endamwamu ase biria anyoorire ase enchera etari endonge. Korende moiroke Nyasae na gokora emeremo yao. Ekiagera ase Nyasae amang’ana ayio onsi nigo are amororo kegima ase okomotenenkia omotaka rimo rioka. ⅩⅫ Abanto abaya nigo bakonyoora ogosesenigwa korwa ase Nyasae. Omonene nigo akogosesenia rimo rioka. ⅩⅩⅢ Tobaisa goteeba Ng’a: “Ninki nganetie naende? Gose, Ninki ndanyore ase engaki egochia gocha?” ⅩⅩⅣ Naende, toteeba ng’a: “Ninde na kera egento eki gekong’isanekia. Mbokong’u ki Mbwate ntanyare, gose borambue?” ⅩⅩⅤ Ekero ebinto bitari buya, abanto nigo bakweba, mbari korengereria ng’a chingaki nchireo chinkong’u, n’engaki y’emechando onde taiyo okoinyora amagenderero. ⅩⅩⅥ Nyasae nabo araganye goika engaki twakure, ekero gi’ekina kera oyomo aragambigwe koreng’ana n’amakora aye, ⅩⅩⅦ engaki enyeng’e igo omonto akwebera omogooko oye, erio omonto nigo rirorio akomanyekana buna are ekero ere aikire omoerio bw’obogima bwaye, ⅩⅩⅧ na mbuya omonto atarakwa, ekiagera amaroro onsi nigo akorentwa ekero omonto akure, ⅩⅩⅨ toigwera onde obororo ase nyomba mwao; ekiagera emetego y’abanto abanyaborimo n’emenge. ⅩⅩⅩ Omonto omwerori nigo anga buna ekebekerero gekobekwa maiso marore, buna omotuki bw’amang’ana, erinde oyatuka ase okworokia oboreu bwaye. ⅩⅩⅪ Omonto oyio nigo akoonchora amang’ana amaya koba amabe, na korora obobe ase ayare amaya. ⅩⅩⅫ Ensase eyemo y’omorero nabo egwokia ⅩⅩⅩⅢ Erende mono kegima n’omonto amakora aye atari amaronge, ekiagera nigo orabe n’obokong’u bataere. ⅩⅩⅩⅣ Oise komwaarigania mwao nabo orarente obokong’u; nigo ararente obotutukanu, erio moetane n’abamino.