Ⅰ Onye gotagete gokora amaya chora omonto ogokorera; erio naye n’osesenigwe ase amaya ao. Ⅱ Kora amaya ase omonto omoirogete Nyasae naye n’osesenigwe; naye n’otogigwe n’omonto oyio, gose n’Omonene. Ⅲ Kende kiya nkeiyo kerarwe ase omonto ogendererete gokora amabe, gose omonto otari korua ekengwanso. Ⅳ Koonya abanto baria bamoirogete Nyasae, korende, tiga gokoonya abanyabibe. Ⅴ Kora amaya ase abaitongo korende, tiga kobaa kende gionsi ase abanto baria batamoirogetii Nyasae. Abanto buna abwo tobaisa kobaa ndagera ende yonsi, ekiagera endegera eyio nigo eragere bakoiyerie korwa ase ekerogo kiao, naye bono n’oakanwe n’obobe ara kabere. Ⅵ Nonya ’Omonene nigo agechete abanyabibe. Nere n’abae egesusuro abatamoirogetie. Ⅶ Omonto ore omuya moe ekia aganetie, korende toa omonyabibe. Ⅷ Nigo ere akong’u kegima komanya ng’a ning’o omosani na kegima ekero ebinto bire buya, korende ekero kiobokong’u nigo ere aororo komanya omobisa oo. Ⅸ Ekero omonto asesenigwe, abasani baye nigo bakoba n’obororo mono kegima. Nonya nabo, ekero ki’obokong’u nonya n’abasani baye abanyene nigo bakomotama. Ⅹ Tobaisa kweba erio bwegene omobisa oo; obobe bwaye nigo bonga obobosu ase gento kende gionsi. Ⅺ Nonya noria ogwekeeyia na gotugama bosio bwao, erende ase amabe aye. Omonto buna oyio nigo anga buna ekerore kiabosiire onye tikeri kogenderera kona gosibigwa. Ⅻ Tiga kobeka omobisa ang’e naye, ekiagera nigo akogoonchora na gokobeka aase otagwenereti. Tobaisa komoikaransia ase okoboko kwao gwokorio, ekiagera nigo araire egento kiao kiamasikani, erio nario oramomanye obomaene kegima buna omonto oyio are. Erio ng’a bweitie ase ayio nagotebirie. ⅩⅢ Omonto karabe ogokora echeche n’eng’iti engenda inse na keramorome na ero, gose ching’iti chinde chi’orosana chintindi; tomororera amaabera! ⅩⅣ Ase igo, monto taiyo oramorore amaabera. ⅩⅤ Omonyene ebibe nakwane ng’a naye, korende gokonyorwa n’emechando nigo akogotama ogotiga gochia abwo igo. ⅩⅥ Omobisa oo nigo aragokwanere n’amang’ana amaya mono kegima, korende ase omoyo oye ime nigo agendererete koroberia akonyore engoro ime. Omobisa oo nigo akorera amariga amange, korende aise konyora ribaga iga, na sirie obogima bwao. ⅩⅦ Oise konyorwa n’obokong’u, nagwo okomonyora okoganyete, okwebonia ng’a nkogokonya are, na anii, nigo aroberetie kogokoora kegima. ⅩⅧ Omonto nasingisie omotwe na goaka chinkobi, namonyererwe amange erio aonchoke na koba omonto omoao kegima.