Ⅰ Monto onde bwensi ogokuna eramu nigo agwetiringa, n’oyo okobwaterana n’omonto omwerori. Nigo akobweka. Ⅱ Tibwancha kobogoria egurube ebuete chinguru chiao, tobaisa kobwaterana n’omonto omonyanguru, gose omonto omotenenku. Enyongo erosirie korwa ase amoroba naki eranyarekane ebwaterane n’ebirika eroiserie echuma? Enyongo eye amo n’ebirika bise gotwomana, n’enyongo erateke. Ⅲ Omonto omotenenku nigo akomochia omonto naende omenta koongora. Korende omotaka ko agoseire omonto, nigo akobeterereka gosaba amabera. Ⅳ Omonto omotenenku nigo akororera abataka emeremo ngaki ende yonsi arooche ng’a nanyore eng’eria korwa ase ore. Korende ekero aye otagete ere agokoonye nigo akogotiga gochia agwo igo. Ⅴ Omotenenku oyio akorore kore n’egento nigo agokoberera ang’e, na onagosakora ebinto biao ng’ora-ng’ora goika obikoora kegima. Atari n’amaabera. Ⅵ Ekero omonto oyio are na kogania konde gwonsi nigo agokong’aina, nigo akogosekera erio okoa ogosemeria. Ekero akoboria egento nigo akoboria n’obwororo kegima: “Noganetie kende?” Ⅶ Ekero agokoarigania ase endagera yaye, nigo arabaisa gokoa obosooku. Ekero akourire egento ara kabere gatato iga, igo akogosekerera. Oise kogenda komorora omonto oyio ng’ora nigo agwekora buna takomanyeti, erio osingisia omotwe na gokana kegima. Ⅷ Renda tobaisa gosirigwa, na koegwa obosooku ase omoyega oo. Ⅸ Onye gwachikirwe n’omonto bw’amasikani, kabe omonto bw’omoroberio; erio nario aragochiike naende. Ⅹ Tiga kw’eira ase omoyega bw’omonto n’endamwamu, ekiagera nigo orabaisa goserigwa. Korende, naende oise komobeera are nigo agokweba. Ⅺ Tiga kwereng’ania nere, gose kwegena amang’ana aye amaang’e. Ekiagera nigo oranyore ngoteema are ase amang’ana aye amaange, erio agosekerere ase okona kogoitona. Ⅻ Omonto otari kogacha obobisi nigo anga buna omoiti. Takoganya kogokorera bobe gose gokosiba enkendu ime ⅩⅢ Renda obobisi bwao na mbuya kwerenda, ekiagera nigo ogatara ase amakweri. ⅩⅤ Kera egetongwa nigo kegwancha egetongwa kende gekebwekaine, naboigo Mwanyabaanto nigo agwancha Mwanyabaanto omwabo. ⅩⅥ Bitongire binde bionsi nigo bire n’oboamate n’ebitongire biamwabo, n’omonto nere otwara oboamate n’omobwekaine oye. ⅩⅦ Esese y’orosana n’emanwa yeng’ondi mboamate ki bibwate? Nigo ere akong’u mono; ase enchera buna eyio, nigo ere akong’u omonyabibe kobwaterana gati yomonyabibe amo n’omonto omoirogete Nyasae. ⅩⅧ Inee, omorembe nore gati y’enyang’au n’esese? Naende, inee, omorembe nore gati y’omonda amo n’omotaka? ⅩⅨ Rigwari nigo rire ogotwara kw’endo; naboigo omotaka nigo are oborisia bw’abatenenku. ⅩⅩ Okogechia igo okogechia okonene mono ase omonto omwerori, ase enchera eyio eyio, omotaka igo kore okogechia gochia ase omotenenku. ⅩⅪ Ekero omonto omonda akogochwa nigo agosiirwa n’abasani baye, korende omotaka aise kogwa abasani baye nigo bakomotama. ⅩⅫ Omontenenku akore amamocho, abanto bakomokoonya nigo bakoba abange kegima; ng’a nonya n’ekero agokwana amang’ana ataisaini, ayio nigo akoba buna enguba asare. Ko bono omotaka aise komocha, agwo-agwo nigo bakomotogonyera; naisa gokwana n’echisemi, onde taiyo okomoigwa ng’a nareo. ⅩⅩⅢ Omotenenku aise gokwana, abanto bonsi nigo bagokira kiri. Abanto nigo bagotogia enkwano yaye gochia amare igoro; tiga bono omonto omotaka akwane, abanto bonsi bana goteeba iga: “N’oyio nere ning’o?” Ekero omotaka akogochwa, abanto nigo bakomotwomerania gochi inse. ⅩⅩⅣ Obotenenku n’obuya mono ekero botabwataini n’ekebe. Obotaka n’obobe ase baria batamomanyeti Nyasae. ⅩⅩⅤ Keria kere ime y’omonto nakio gekororekana isiko y’omonto. ⅩⅩⅥ Obosio bosasogete nigo bore ekemanyererio ki’omogooko ase omoyo, nabo okorekana kore n’omogooko. Korende, oyo ogotegora emebayeno eye goika abe omong’aini.