Ⅰ Omonto omoirogete Nyasae, omonto obwatete ebirage biaye n’amonyore chisemi. Ⅱ Ere chisemi n’akwariganie buna omokungu omonyanyangi akoarigania omonywomi. Ⅲ Nyasae nakoe obong’aini buna omonto akoegwa endagera amo n’ekenyugwa. Ⅳ Omonto n’agamerere chisemi erio chimokoonye tagwa erinde anyore obosooku. Ⅴ Ere chisemi nakoimokererie igoro kobua abaamate bao; n’ekero ogokwana gati-gati y’abanto ere chisemi nakoe ekio orakwane. Ⅵ Ase chisemi aye n’onyore omogooko n’omogooko bw’ekeene, erio erieta riao ng’a riinyorwe goika kare na kare. Ⅶ Korende, abanto abariri amo n’abanyabibe tibakonyora chisemi. Ⅷ Chisemi nigo chire aare korwa abanto aberori; chisemi tichigosoa ase ebirengererio biabang’ainereria. Ⅸ Omonyabibe tagwenereti goteera amateera yokomotogia Nyasae, ekiagera ogosasiima kwaye tikori korwa enkoro yaye ime. Ⅹ Amateera goika abe ekemanyererio gi’echisemi. Ekio gegokong’usa gochia ase Nyasae. Ⅺ Tiga gotaamera ng’a: Nyasae ogera namocha. Naki aragere okore ekebe nere ogechete ekebe? Ⅻ Tobaisa goteeba ng’a Nyasae nere ogerire, ekiagera ere taganetie ogokoonya kwomonyabibe. ⅩⅢ Nyasae nigo angete okogecha gwonsi. Nonya mbaria bamoirogete Nyasae nigo bayangete ayio. ⅩⅣ Agwo ritang’ani kegima, Omonene nere otongete mwanyabaanto, akamoa obosibore bw’ogwechorera amang’ana aye ereomonyene. ⅩⅤ Onye koganetie, nabo okoigwera ebirage bia Nyasae, erio omenye ase okwegena gose ochore buna origetie. ⅩⅥ Omonene obekire bosio bwao omorero amo n’amache: rambora okoboko kwao, bwechorere keria oganeti. ⅩⅦ Mwanyabaanto obekeirwe bosio bwaye obogima amo n’amakweri; ase ebio bibere, keria agochora nakio akoegwa. ⅩⅧ Chisemi chia Nyasae n’echinene kegima; ere nigo abwate chinguru chi’obomanyi bwa kera egento. ⅩⅨ Omonene nigo arigereretie ase obuya; ere nigo amanyete aya Mwanyabaanto agokora. ⅩⅩ Chisemi tichianya kobetereria monto onde bwensi komoiroka Nyasae, gose gochika onde gokora ekebe.