Ⅰ Nyasae ere oyomenyete goika kare na kare, nere otongete ense yonsi. Ⅱ Nyasae bweka nere ogokora ebinto bionsi ase oboikeranu. Ⅳ Taramoa monto onde chinguru naende chi’okoraria emeremo yaye; na monto tari oranyare koyetuka. Ⅴ Ning’o naende oranyare korenga chinguru chiaye chinene? Ning’o oranyare ase oboikerenu chinema chiaye. Ⅵ Tekonyarekana ase ogokeia chinguru gose komenta emeremo yaye. Tekonyarekana koyamanya amang’ana amakumia a Nyasae. Ⅶ Ekero Mwanyabaanto agoika omoerio bw’amang’ana ayio nigo akwenyora ng’a ko nario omochakano bw’amang’ana; n’ekero atigire, nario bono agotabanana. Ⅷ Omonto ning’o naende ninki aisaine? Ⅸ Omonto ekero aikire emiaka rigana, oyio omenyire emiaka emenge. Ⅹ Korende, ekero okorigereria buna entonyi y’amache korwa nyancha na buna koreng’ana omochanga ore ase engegu y’enyancha; naboigo ere emiaka ere emeke kobua obogima bwa kare na kare. Ⅺ Ase igo, Nyasae nigo akobaremereria gocha ase tore na amaabera, naboigo tore n’oboremereria ase okororerana amaabera. Ⅻ Ere nigo agotorigereria na korora buna toragereirie ase ogokwa; nakio gekogera are ang’e gotwabera ⅩⅢ Omonto nigo akoba n’amaabera ase omoamate oye, korende amaabera a Nyasae nigo are gochia ase ebitongire biaye bionsi. Ere nigo agotogonyera naende bw’orokereria, na obasomia, na nigo akobarenda buna omorisia akorenda riicho riaye. ⅩⅣ Nyasae nigo abwate amaabera baria akoraa na banchete bakobwata na bakoigwera ogochika kwaye. ⅩⅤ Omwana one, toburukania amakora ao amaya n’echingencho chimbe chi’okoragererigwa. K’ogokoonya omotaka tiga komosiibia obororo n’amang’ana ao. ⅩⅥ Inee, rimi tiriri kogokia ebimeri ase engaki y’omorakera, boigo eng’ana yao eyemo enke nigo eisaine kobua ekeegwa. ⅩⅦ Ring’ana erimo ndisaine kobua ekegeni, n’omonto omwororo nigo abwate ebio bionsi bibere. ⅩⅧ Omonto omoriri, ere n’omoiti. Ekeegwa kiomonto omochayi, nigo kegotuba amaiso. ⅩⅨ Eorokererie ritang’ani otarachaka gokwana. Renda obuya bw’omobere oo ritang’ani otararwara. ⅩⅩ Eitone na kweitia rituko r’ekina ritaraika, ase rituko erio, ekero gwaikire, ng’a n’onyore amaabera. ⅩⅪ Ekeyie aye omonyene otarachia koegwa egesusuro ki’obebe bwao. ⅩⅫ Onye kwabeekire egeteebanio na Nyasae, koranche ikerania egeteebanio ekio ase obwango buna ekonyarekana, tobaisa koganya amakweri, ng’a erio omanye kw’aberwa. ⅩⅩⅢ Eariganie ritang’ani kegima otarachia gokora ebitebanio; erio tobaisa koba buna omonto okomoteema Nyasae. ⅩⅩⅣ Rengereria! Inyora ekeririanda kia Nyasae ekio kerabeo rituko riria orakwe kore n’ekebe. Ere nigo arakoererie amagega rituko ria ekiina. ⅩⅩⅤ Ekero oigotete, inyora engaki y’enchara; n’ekero y’obotenenku, inyora engaki y’obotaka. ⅩⅩⅥ Korwa mambia chuni goika mogoroba, chingaki nigo chikona goncha-onchokana. Nyasae nare n’okobua kwogonchora omoroberio bw’ebitongire biaye bionsi. ⅩⅩⅦ Omonto ore n’echisemi oyio n’omonto okorigereria mono ase kera egento kere bosio bwaye. Ekero aikereirwe n’ekebe nigo akwerenda tamocha. ⅩⅩⅧ Kera omonto okorengereria namanyete chisemi, na nigo agotogia kera omonto ochinyorire. ⅩⅩⅨ Abanto baria bagotegerera chimbachero nigo bagochia baba n’echisemi; nabarabwo nigo baichire n’emebayeno. ⅩⅩⅩ Tobaisa kobwatia erang’o yao embe, korende keyia okogania kwao. ⅩⅩⅪ Oise gwechwara ase okwegokia n’erang’o y’amabe, nigo oranyore kweirire aye bweka ababisa bao bagosekerere. ⅩⅩⅫ Tobaisa gwesoia ase emegoko emenge yabosa, ekiagera enengo eyio nigo ekogotakaia. ⅩⅩⅩⅢ Tiga gwekora omotaka ase okonagosaberera, erio gotwara chitaabu chi’emeyega emeneene ekero aye otari nagento ase ekemoya kiao ime.