Ⅰ Omokori emeremo omoriri, oyio tagotenenka. Oyogosiereria amang’ana amake-amake naboigo nere nigo akonakogwa ng’ora-ng’ora. Ⅱ Edivai amo n’okorigia abakungu, ebio bibere nigo bigosiria abasacha b’echisemi, Ⅲ n’omosaacha ogwechwara igo oyio nasirie obogima bwaye. Ⅳ Omonto okwegena abanto bande bwango-bwango, oyio tari nobong’aini. N’oyogokora ebibe, oyio nigo agwesiria ere omonyene. Ⅴ Omonto okogokera ekebe, oyio nagambigwe. Ⅵ Eginge n’echikwana chitari ndonge, erio mbweriite n’amang’ana amabe. Ⅶ Tiga kona koirorera amang’ana kwaigure boire-boire, erio nario naye nario oreongore korwa ase amang’ana amange. Ⅷ Tobaisa goteebia monto, naaba omosani gose omobisa oo, otatiga ekero rioka erabe ekebe onye togoteeba. Ⅸ Ekiagera nabo erabe ng’a omonto gete okoigure na gokorora, n’ekero engaki yaikire nigo arakwange bobe. Ⅹ Inee! Kwana koigwa kende? Na tiga gekwe amo naye. Korende tibwoboa! Erio tirikogera okwe. Ⅺ Omonto omoriri otagete kobisa ’ng’ana rinde rionsi, oyio nigo akoberebencha n’obororo buna boria bw’omokuungu okoibora. Ⅻ Buna riria ensara yamobetire omonto ase ekenama kiaye, nabo ere igo igo ase omonto omoriri oyio origetie goteeba ring’ana aigure. ⅩⅢ Kooraigwe ng’a omosani oo omochire, ’mbuya ritang’ani omoborie ere omonyene, ekiagera nabo oranyore ng’a amang’ana ayio tari ay’amaene. Korende eisa koba amaene omonto oyio takoirorera rimocho erio naende. ⅩⅣ Koraigwe ng’a omoamate oo okwanire ring’ana ritagwenereti, karamoria ritang’ani, nabo oranyore ng’a tarikwaneti. N’onye orikwanete, takorirorera naende. ⅩⅤ Onye kwaigure ring’ana riibe igoro y’omosani oo, nabo oranyore tarikwaneti. Ase igo, tobaisa kwegena kera egento ekio kwaigure. ⅩⅥ Omonto nabo arakwane egetagwenereti, ekio ere omonyene ategeneti. Korende, ning’o ere otanagokora ekebe? ⅩⅦ Koraigwe kende igoro y’omwamate oo; moborie, tobaisa komogosa! Kae ebirage bia Nyasae ribaga bikore emeremo. ⅩⅩ Chisemi chionsi bombera, n’okomanya Nyasae; n’echisemi chionsi nigoro y’okoigwera ebirage bia Nyasae. ⅩⅫ Korende okomanya amabe tari korokwo chisemi, n’ogosemia kw’omonyabibe tari obong’aini. ⅩⅩⅢ Nabo eranyarekane omonto gokorera obong’ainereria ase chinchera chimbe ase okogechia gwoka. Korende nareo omonto omoriri otari na semi. ⅩⅩⅣ Mbuya ase omonto omoirogete Nyasae otari na semi kobua omonto ore omong’aini, ko bono okobuna amachiiko. ⅩⅩⅤ Mbareo abanto bare abang’ainereria, abwo batari gokora ayare aboronge; mbareo n’abande abwo bagosiria obuya bare nabwo ase okonyora ebi baganetie. ⅩⅩⅥ Mbareo abanto bande abwo bagotirigoya, bagwetakoria ng’a mbare n’obororo, korende ime yabo nigo baichoirwe n’oborimo bwoka. ⅩⅩⅦ Abanto buna abwo nigo bakobisa amasio erio boorokia ng’a mbarochi kende; korende nigo bare buna abatari kororekana, na abwo nigo baragosirie. ⅩⅩⅧ Onye ase enchera eyemo gose eyende tibari neribaga riogokora amabe, ekero bagochia konyora ribaga erio, goika bakore ebibe. ⅩⅩⅨ Omonto nigo akomanyekana koreng’ana buna akororekana, n’omonto ore n’ echisemi nigo okomomanya ekero mwaumeranire nere. ⅩⅩⅩ Enchera omonto aboyetie n’echiaanga chiaye, n’enchera agoseka na gotaara, ebio bibere nabo bikomoorokia buna are.