Ⅰ Omwana one, onye gokomokorera Nyasae, kabe ang’e konyora amatemwa amakong’u kegima. Ⅱ Kabe omwororo na obe n’omoyo oyomo; na tokumia ekero emechando egokonyora. Ⅲ Motunyane Nyasae tomotiga nonya ng’ake, erio nosesenigwe ase omoerio bw’obogima bwao. Ⅳ Yaanche onsi ay’arabe agokonyora; nonya are ayemechando n’ogochaaya yaremerererie. Ⅴ Amagena y’Etaabu nigo agosambwa ase eriiko riomorero boigo nabo ere ase abanto baria bancheire na Nyasae Ⅵ Mosemerie Omonene, nere nagokoonye, bwatia enchera endonge na komosemeria omonene bweka. Ⅶ Inwe baria momwegenete Omonene ganya amaabera aye, timoonchoka korwa asare erio morabaise kogwa. Ⅷ Inwe baria mwensi abamomoirogete Omonene, mosemerie ere bweka erio ’na monyore eng’eria yaino. Ⅸ Inwe baria momoirogete Omonene, twara ogosemeria ase omogooko n’ogoesenigwa na amaabera akare na kare. Ⅹ Morengererie ebigori biaetire erio mweborie: Ning’o Omonene anagotiga oyio omosemeretie ere? Omonene onagotiga monto onde bwensi oyio ogendererete ase okomosika? Omonene onagotiga omonto onde bwensi oyio okomosaba? Ⅺ Omenene Nyasae n’omwororo naende n’omonyamaabera, Nigo agotwabera ebibe biaito na gotorenda korwa ase emechando yaito. Ⅻ Oragereriigwe omonto otateneini bokong’u oyore n’echitang’atang’u ase omoyo oye! Oragereriigwe omonyabibe n’otabwateti enchera y’omonene. ⅩⅢ Baragereriigwe abanto baria bare n’obwoba ase emioyo yabo ime naboigo abanto batari n’okwegena! Abanto buna abwo tabakonyara korendeka. ⅩⅣ Mwaragereriigwe inwe abanto aba mwasiririe ogosemeria kwaino ase Nyasae, korende ’naki morakore ekero Omonene Nyasae arabae egesusuro? ⅩⅤ Baria bamoiregete Nyasae tibari kwanga koigwera ebirage biaye; na baria bamwanchete nigo bakomenya buna ere aganetie bamenye. ⅩⅥ Baria bamoirogete na bamwanchete Nyasae goika barigie komogokia na bakobwata ebirage biaye. ⅩⅦ Baria bamoirogete Nyasae nigo bare ang’e komokorera botaambe, barabwo abwo nigo bagwekeyia bosio bwaye na koboora iga: ⅩⅧ Tiga twebeke ase amaboko a Nyasae na tari ase amaboko a Mwanyabaanto. Ekiagera ase obonene bw’omonto oyio, nabo borabe buna amaabera aye.