Ⅰ Abana baane, tegererera ogesemia gwa Iso. Kora buna ’nkobateebia, erio ’monyore obuya; Ⅱ ekiagera Omonene Nyasae oeire abaiso okobua igoro y’Abana babo na goikerania okobua kw’abang’ina gochia ase abana babo. Ⅲ Oyokoigwera ise nigo akwenyorera amaabera korwa ase ebibe biaye; Ⅳ na onye gosigete nyoko ’mbwegachere obotenenku obonge. Ⅴ Oyosigete ise oyio nagokigwe n’Abana baye ere omonyene, n’ekero arasabe omwana kende gionsi omwana namotegerere. Ⅵ Mwana onde bwensi osigete ise na komogokia ng’ina oyio namenye obogima obotambe. Ⅶ Abana, igwera abaibori baino buna koreng’ana omosibwa akoigwera omonene oye. Ⅷ Oigwere iso ase amang’ana na ase amakora, nario oranyore ogosesenigwa Ⅸ Ekiagera ogosesenia gwaiso nigo kogokong’ia ororeria rw’abana baye, korende okoragereria kwa nyoko nigo kogosiria oboroso bw’Ororeria rw’egesaku ekio. Ⅹ Omwana one tobaisa gochaaya iso, ekiagera ogochaaya iso tigokorenta buya bonde bwonsi. Ⅺ Ogosika kwao aye omonyene nigo gokorwa ase amasikani aria okorwa gochia ase iso. Ⅻ Omwana one, orende iso ekero abeire omogotu, gose tomosiibia obororo. ⅩⅢ Nonya nekero chisemi chi’amoereire, omoremererie; gose tomosiereria ase engencho ore n’echinguru n’obuya bw’omobere. ⅩⅣ Nyasae omobui takweba obuya boria gwakorerete iso, obuya obwo mbokorentere amaabera korwa ase ebibe biao. ⅩⅤ Ase rituko ri’emechando, ’ng’a riinyorwe ekero ebibe birabeere buna amagena y’embura buna akobeera ase amache amaberu. ⅩⅥ Oyokomotuguta ise oyio okorire chimuma as obosio bw’Omonene Nyasae; oyokorenta obororo ase ng’ina oyio onyorire okoragererigwa kwa Nyasae. ⅩⅦ Omwana one, kabe omoitongo ase orogendo rwao ase amang’ana ande onsi, naye ’na bwanchwe na baria bonsi banchirwe n’omonene. ⅩⅧ Buna ore omonene ang’ana naboigo bwekeyie ase enchera eyio eyio. ⅩⅩ Chinguru chia Omonene Nyasae nechinene kobua, korende nigo agotogigwa na baria bare n’ogwekeyia. ⅩⅪ Tobaisa korigia ebinto ebire ebikong’u ase ore, gose korigia ebinto bire aare n’okobua kwao. ⅩⅫ Bwata mono ayio gwatebeetigwe gokora, toganeirie gwechandera amang’ana ayio abisekanete ⅩⅩⅢ Tobaisa gwesoyia ase amang’ana akobweete chinguru, ekiagera ayio onsi okworokigwa ’ng’aete ase ebirengererio bia Mwanyabaanto. ⅩⅩⅣ Ekiagera abange basiriigwe ase ogwekora koba kemanyi ’ng’a mbamanyete mono kegima, korende ogwekaga kwabo gwasiririe ebirengererio biabo. ⅩⅩⅤ Onye tobwati amaiso tokonyara korora; tobaisa kweganeria obong’aini onye tobobwati. ⅩⅩⅥ Omonto omwerori nigo agokoorera aabe; n’oyobwanchete amabe nigo agosirigwa. ⅩⅩⅦ Omonto omwerori nigo akobugwa n’emechando; omokori amabe nigo agwetindeka ase ebibe kera engaki. ⅩⅩⅧ Emechando y’omonto omwerori teri kogwenigwa, ekiagera obobe boria bwamerire emeri ime yaye. ⅩⅩⅨ Omonto omong’aini nigo akorengereria emebayeno omoyo oye ime; ng’a koba omonto ogotegerera obwo nabwo obong’aini ⅩⅩⅩ Buna amaache akorimia omorero omotindi mono, nabo n’ekengwanso ki’omotaka gekorenta okwaberwa kwe’ebibe bi’omotaka. ⅩⅩⅪ Oyokororera oyomwabo amaabera nigo akorengereria aare, erio engaki y’emechando okoonywa.