Ⅰ Aye Nyasae Tata, n’omogaambi bw’obogima bwane, ase ogwancha kwao tintiga erio insirigwe na n’emechando yane; gose obaisa gwancha nkore amabe ase engencho yaye. Ⅱ Onye nokobua, ango ebirengererio biane nigo biare gochwatwa ebiranya, n’omoyo one bworokererigwe chimbua chi’obong’aini. Abwo bono tinaregotigwa nkona kogororwa korwa ase amamocho aane, n’ekebe kiane kende gionsi kegosusurwa; Ⅲ erio amamocho aane tamentekana mono kegima, n’ebibe biane mbimentekana. Ase igo tingwa ase amaboko y’ababisa. Ⅳ Aye Nyasae, Tata na Omogambi bw’obogima bwane, nagosororire nkoonye timbaisa koba n’obwerori. Ⅴ Aye Nyasae koranche nagosoroire onginge korwa ase okogania kwane okobe. Ⅵ Tobaisa gwancha gontiga mbe omochayi gose mbe n’okogania okobe. Tontiga ngaamberwe n’okogania okonge okobe Ⅶ Abana baane, tegerera erinde moigwe okworokereria igoro y’ogokwana okuya; omonto okoyaigwa na koyabwatia amang’ana ayio, oyio takogwa ase omotego. Ⅷ Omonyabibe nigo akobwatwa ase okweimokereria na amang’ana aye omonyene. Ⅸ Tobaisa kwenaria gose konara chingeencho chiogotiana gose kona gwatora erieta richenu ri’Omonene ase ogokora echeche. Ⅹ Buna ere ase omokori emeremo okorendwa mono atari komocha goakwa ebiranya, boigo, oria okona gotiana ase okoriatora erieta ria Omonene Nyasae, ekeene ere tagotamboka korwa ase ogokora ebibe. Ⅺ Omonto okona gotiana boire nigo agoichorwa n’obobe na obokong’u tibokorwa ase enyomba yaye. Ere abe taikerania aria atianete ere goika abe nokomocha; naende karasiererie nabe nokomocha ara kabere. Karabe otianire bosa, takorengererigwa buna oyo otari na komocha, ase ayio ere nomomochi rioka, ere goika aegwe egesusuro; na ase enyomba yaye ogokwa nkobeo botambe. Ⅻ Ogokwana nkoreo konga ogokwa okonyene. Okwo tikobaisa koba ase abaiborwa ba Yakobo. Baria bamoirogete Omonene Nyasae barabwo inabatamboke amomocho ayio onsi igo barabwo tibagwesigooria ase ebibe. ⅩⅢ Tobaisa konaria ebikoba biao gokwana obogundo, ekiagera ase ogokwana okwo nigo kobwataine nebibe. ⅩⅣ Ekero oraikaranse na abanene oinyore iso na nyoko, tobaisa kobeeba agwo ase obosio bwa abanene erio ororekane omoriri ase obosio bwa abanene ase chinchera chiao. Agwo aye inabweitie na koragereria rituko riria aye kwaiboretwe. ⅩⅤ Omonto onarete amang’ana amagundo ituko ndiri arabe n’amasikani ase obogima bwaye bwensi. ⅩⅥ Abanto be chinchera ibere nigo bakoiranerera ebibe, ab’enchera ya gatato nigo bakorenta endamwamu y’Omonene. Omonto nigo agosogwa n’ogwoka gwokogania buna omorero otakende goika orimirigwe. Omonto ogosambwa n’omorero bw’ogokorera omobere oye omonyene obonyaka tagotiga goika ere omonyene osiriigwe ase omorero. ⅩⅦ Ase omonto omonyaka, kera omokungu nomwansu na takonyora ogoisaneka amatuko onsi ere amenyete. ⅩⅧ Omonto nigo akobuna eira yaye y’enyaangi na goteeba ase omoyo oye: “Ning’o ondooche? Omosunte nigo ong’etanaine nechinyasi nigo chimbisete! Monto taiyo ondooche, inche ninki ndoboere? Omonene takorora ebibe biane!” ⅩⅨ Obwoba bw’omonto oyio nase abanto boka. Ere tamanyeti buna amaiso y’Omonene nigo aramogetie ara chilifu ikomi kobua risase. Amaiso ayio nigo arigereretie chinchera chionsi chia Mwanyabaanto, goika nonya nchiria chionsi chibisegete. ⅩⅩ Ere nigo akomanyete aye konye otaraiborwa goika omoerio ekero ere akoorete gotonga ense. ⅩⅪ Omonto oyio omonyabibe ere nabwatwe engaki eria atakagereti na koegwa egesusuro ase obosio bwa abanto bonsi. ⅩⅫ Naboigo ere ase omokungu oria ogotiga omosacha oye na koibora abana nomosaacha onde. ⅩⅩⅢ Ritang’ani; omokungu oyio ochaayire ogochika kw’Omonene ore igoro mono, eriakabere; okorire okomocha ase omosacha oye, na eriagatato; okorire obonyaka ase obotayayi bwaye, na koibora abana n’omosaacha onde. ⅩⅩⅣ Ere omonyene nigo arabeekwe ase obosio bw’ekegambero, naende naegwe egesusuro goetera ase abana baye. ⅩⅩⅤ Abana baye tibakonyara gotenena ase oboremu, na barabwo tibakonyoora okwama. ⅩⅩⅥ Ere natige okoragererigwa ase ense, na obosooku akorete tibokwebwa kare na kare. ⅩⅩⅦ Baria abatigari inabamanye buna ing’ana rinde ndiri rigiya kobua komoiroka Omonene, na tikeiyo egento egiansu kobua okoigwera amachiiko y’Omonene.