ⅩⅩⅪ
Ⅰ Ekero omonto akorengereria mono igoro yokoborwa chitaabu nigo akorea; ogwechandera ring’ana erio nigo gokomorina chitoro.
Ⅱ Ogwechandera ebiasara nigo kogokorina chitoro kegima buna oborwaire bonde bwonsi obonene bogokora.
Ⅲ Omonto omotenenku nigo agokora omokia korigia obonda; ekero abonyorire oikaransa kobwechegeria.
Ⅳ Omonto omotaka boigo nigo agokora emeremo n’ebigeri korende ebitoki biaye biagenderera gokea, ekero ere agotimoka, onyora tabwati kende agwetogeria.
Ⅴ Onde bwensi bwanchete chitaabu takobarwa koba omooronge ekiagera okorigia kwaye chitaabu nigo gokomokora omomochi.
Ⅵ Abange basariigwe nechitaabu na ogoitwa kwabo nigo gokabachera obosio ase obosio.
Ⅶ Obotenenku nigo bore omotego ase baria bakoirwa na borobwo, nigo bore omotego ase akogwa kera omonto omoriri.
Ⅷ Nasesenirie omonto ore omotenenku otari komochigwa, omonto oria otari kominyokia obotenenku.
Ⅸ Onde nare omanyete omonto bw’engeencho buna eyio inwe tomotogie? Ee ekiagera ere okorire egekone monto onde atana gokora.
Ⅹ ’Monto ki otemirwe n’obotenenku na kobua atari na komocha? Omonto buna oyio karabeo, ere nare noboronge bw’ogwetogia! Gose ning’o onyorire ribaga riogokora ebibe ere tabikora?
Ⅺ Obotenenku bw’omonto onga buna oyio inabomenye na emeganda nemanye oboitongo bwaye.
Ⅻ Ekero oraariganigwe ase omoyega omonene, aye tobaisa koba nokogania okonene kw’endagera gose goita egekoe oteebe, “Endagera eye tekari enyinge!”
ⅩⅢ Inyora buna eriso riobonyandambe neribe. Inee, egento nkere egetoonu buna eriiso? Nakio gekogera amaiso akorwa amariga chingaki chionsi.
ⅩⅣ Tobaisa korambora okoboko kwao kobogoria egento oyomino aganetie, gose komoaka ekegokoro oyomino erio omoure endaagera.
ⅩⅤ Manya okogania kw’oyomino na omwereng’anie ere boigo obabogorerie abamino ase kera enchera.
ⅩⅥ Karie kera egento okoegwa buna omonto ore na amasikani gose tobaisa gotakuna-takuna obaise kwangwa.
ⅩⅦ Nering’ana rigiya ase ore aye koba omotang’ani koigota, toba rinyandambe obaise kogechia abanto.
ⅩⅧ Ekero orabe gwaikaransire aye amo na abanto baane, tobaisa koba oyo bw’eritang’ani kobogoria endagera.
ⅩⅨ Endagera enke nigo ere enyinge ase omonto obwate amasikani, ere tagwechaanda ekero akoirana gochia bwoye.
ⅩⅩ Omonto okoragera nekerengo nigo akonyoora chitoro chingiya, ere nabooke bwango na kweigwa ore buya. Korende rinyandambe takonyoora chitoro, ere nigo akoonchoka omoyo naende na koromwa enda.
ⅩⅪ Keraabe yakobetereirie koria endagera eetanetie ekerengo, sooka oroke erio aye noigwe buya.
ⅩⅫ Ntegerere omwana one, aye tobaisa gonsiereria naye omoerio noyamanye buya aya nkogoteebia. Aye obe nomokia ase emeremo yao yonsi eyio oraabe kogokora, naye tokonyorwa na borwaire bonde bwonsi.
ⅩⅩⅢ Abanto nigo bagotogia oria ore omwasioku ase okobaa endaagera, ne chinkwana chiabo igoro y’obuya bwaye nigo chire echi’ekeene.
ⅩⅩⅣ Omonto omwegimeria ase ebiakoria nigo arararigwe ase ekenyoro ekegima, n’echinkwana igoro yobong’iti bwaye nigo chire e chikeene.
ⅩⅩⅤ Tobaisa kwerorekania buna nigo ore egeata giokonywa amarwa, ekiagera edivai yaitire abange.
ⅩⅩⅥ Chinchera chi’omonto omoenenu nigo chikororekana ese chinkwana chiaye ekero atindire, buna boigo obokong’u bwechuuma bokororekana ekero yasambirwe ere embariri kegima na gosoigwa ime ase amaache.
ⅩⅩⅦ Edivai nigo enga obogima oboyia ekero omonto akoyenywa ase ekerengo. Obogima ninki edivai etaiyo? Aro nigo aroisirie agokie abanto.
ⅩⅩⅧ Okonywa Edivai ase ekerengo nechingaki chiaye nigo bikorenta omogooko ase omoyo nemosasoko ase enkoro.
ⅩⅩⅨ Korende okonywa edivai goetania ekerengo nigo gokorenta ogwatigwa omotwe, obororo na amachaaya.
ⅩⅩⅩ Ogotinda nigo gokomenta ekeririanda kiomonto omoriri nogweita omonyene; nigo gokomoreyia na komomenta amaote.
ⅩⅩⅪ Tobaisa komotogonyera omoamate oo ase edivai, gose komochaaya ekero akwegokia ase omoyega. Tobaisa komoteebia ring’ana riokomokuurera, gose komochaanda ase okogania aakane edeni.