Ⅰ Ekero aye orakorwe koba omoteneneri bw’omoyega, tobaisa koresania omotwe, aye bwekore koba buna abande ase omoyega; obagenie ritang’ani erio aye oikaranse. Ⅱ Ekero gwakorire emeremo yao, ikaransa aase ao, ogoke na abande na koegwa esiko yao ase emeremo yao emiya. Ⅲ Onye aye kore omonene ase emiaka, kwana; korende okwane nobong’aini tobaisa gosaria omoino. Ⅳ Tobaisa gotambeyia chinkwana onye ebinyugwa bikoruugwa. Tobaisa kwerora namasomo ao ekero ebiro biaye bitaraika. Ⅴ Chingero ase omoyega bw’okonywa Edivai nabo chigwekaine ekemanyererio gietaabu igoro ase amagena yerigori rinene. Ⅵ Chingero chingiya amo n’edivai nabo chigwekaine ogochaberwa okuya gwechiruru igoro ase etaabu. Ⅶ Onye aye kore omosae, okwane ekero rioka ebetereretie; korende tari goetania ara kabere na rioka ekero oraborigwe gokora boigo. Ⅷ Okwane maiso marore, okwane amake ase ayaare amange; tiga erorekane buna nigo omanyete amange korende aye totageti kona gokwana. Ⅸ Ekero orabe ase egati ya abanene tibwereng’ania na barabwo, tobaisa gokwana amang’ana ataisaini aria onarete. Ⅹ Buna okomesa kogotang’anera okogukura, naboigo esiko egotang’anera omonto bwesigete. Ⅺ Soka korwa ase omoyega ase chingaki chigwenerete, tobaisa koba oyo bw’omoerio; ogende inka bwango na tobaisa kona koganya-ganya. Ⅻ Aye bwegokie na gokora keria oganetie, korende tobaisa komocha ase amang’ana y’obwerori. ⅩⅢ Tibweba komotogia Omonene ere oria ogotongete na kogoichoria nebiegwa biaye ebiya. ⅩⅣ Ere oria omoirogete Omonene nigo agwancherana okomochigwa nere, na ere oria ogotang’ana komorigia nanyoore ogosesenigwa kwaye. ⅩⅤ Oria okobwatia amachiiko, nigo agoisaneka koyanyoora, korende omong’ainereria goika anyore egetango. ⅩⅥ Baria bamoirogete Omonene inabamanye gokora aya aboronge, na amakora abo namese buna risase. ⅩⅦ Abanyene ebibe tibancheti komochigwa; nigo bakonyora ogotaamera kwogokora aria barabwo batagete. ⅩⅧ Omonto obwate chisemi tari gosiereria ebirengererio bi’omonto onde, korende omonto omoenenu na omweimokia ere taoboeti gento. ⅩⅨ Tobaisa gokora gento kende gionsi isiko yebirengererio, erio aye tobetererigwa kweitia nyuma ekero gwakorire egento. ⅩⅩ Tobaisa gokora enchera ere nebitango ebinge, aye obaise gochia kogochwa igoro ase amagena. ⅩⅪ Tobaisa kwegena mono enchera erambogete, ⅩⅫ korende aye bwerende mono ase oboeto bwao. ⅩⅩⅢ Bwerende ase kera ok’ogokora, ekiagera eye nero engencho y’okobwata amachiiko. ⅩⅩⅣ Ere oria osemeretie amachiiko nigo akoigwera amachiiko, na oria omosemeretie Omonene takonyora chingoma.