Ⅰ Obobe tibori boramonyore omonto omoirogete Omonene, ase chingaki chiamatemwa Omonene nigo akoiranerera komokoonya boire boire. Ⅱ Omonto omong’aini takogeecha amachiiko korende omong’ainereria ase richiiko nigo anga obwato bokorutwa-rutwa ase enyancha yemerindo. Ⅲ Omonto omong’aini ere nabe omwegenwa ase richiiko, ase are ere richiiko nabo rigwekaine nokonacha kw’Omonene. Ⅳ Roberia keria origetie gochia gokwana naye notegererwe; roberia amo aria aye omanyete erio onyare koiraneria. Ⅴ Enkoro y’omonto omoriri nabo enga buna rigari riomogongoteni na ebirengererio biaye buna oborundarundia. Ⅵ Omosaani omokoora nabo anga ebaarasi eria egoaka eriogi ase kera omoriini. Ⅶ Ninki gekogera kera rituko rikororekana koba riao ko onsi nigo akonyoora omobaso obo korwa ase risase erimo? Ⅷ Omonene nere oetetie gwatanana, na kobeeka ebiro ao ao bi’omwaka na amatuko amanene boigo. Ⅸ Akaroisia amatuko ande koba amachenu na ayande koba amatuko bosa igo. Ⅹ Mwanyabaanto bonsi nigo barwete ase riroba na Adamu nigo atongetwe korwa ime y’orotu. Ⅺ Korende Omonene ase obong’aini bwaye oboikeranu, akabaatanana na koa kera oyomo emeremo ere emeao korwa ase eyoyonde. Ⅻ Ase egati yabo agakiinia abande na kobaa obonene, abande akabakora koba abachenu na kobabeeka ang’e ase are ere. Korende boigo akabaragereria abande na kobakeyia, akabarusia korwa ase abo. ⅩⅢ Nabo enga riroba rire ase amaboko yomoroisia chinyongo ere oyio okoribomba buna ere omonyene anchete, naboigo ere ase Mwanyabaanto ime ase amaboko aye ere oria obatongete; ere bweka nigo agokora buna omonyene agoetia. ⅩⅣ Obuya nigo bore mamincha y’obobe, na obomoyo nigo bore mamincha y’ogokwa, nabo ere boigo omonyabibe nigo are mamincha y’omonto omosigete Omonene. ⅩⅤ Yerigererie emeremo yonsi y’Omonene, nigo ere ebere, kera oyomo mamincha yo oyonde. ⅩⅥ Inche nabeire oyo bw’omoerio koyarigereria ayio, buna omonto okorogota amasabibu ekero abagesi bachiire. ⅩⅦ Korende Omonene onsesenirie mono, inkababua bonsi; buna omogesi bwa amasabibu naichoirie ekebaari kiane giokoigatera. ⅩⅧ Inyora tinekorerete emeremo eye ase ogweisanekia inche omonyene korende nase bonsi baria barigetie kweorokereria. ⅩⅨ Ntegerere inwe abanene abwo more ase egati ya abanto; inwe abanene b’ebiombe, ntegerere inche. ⅩⅩ Ebiro bionsi omenyete, tobaisa komotigera omokungu omwana, gose momura omino, gose omosani akogambere; tobaisa komoa omonto onde obonda bwao, obaisa korwa ekerengererio na kogania oiranerigwe. ⅩⅪ Ekero ore moyo, aye gokoeyaana, tobaisa gwanchera monto onde bwensi abogorie ribaga riao. ⅩⅫ Nigo ere buya abana bao bagosemerie aye kobua aye kobasemeria barabwo. ⅩⅩⅢ Kora kera egento kebe ekiya kegima, tobaisa kobeka ekemoa ase esiko yao. ⅩⅩⅣ Omoerio bw’obogima bwao, ase ensa yao yomoerio, gaba obonda bwao. ⅩⅩⅤ Obonyansi, egurube ne ekeranya ase ebunda, endagera, amasikani nemeremo ase omokori emeremo. ⅩⅩⅥ Kae omokori emeremo oo emeremo naye notimoke, motige bosa atari na meremo erio ere arigie obosibore. ⅩⅩⅦ Beka etugo ende yonsi ase oboigweri goetera ase egesibo na amakorogoto, na omotomwa omobe ase okomochaanda. ⅩⅩⅧ Moe emeremo erio ere tabaisa koba omworo, ekiagera obworo nigo bokomoa omonto obobe obonge. ⅩⅩⅨ Moe emeremo buna ekogwenerete aye, onye tagokoigwera mosibe ebinyuri. ⅩⅩⅩ Tobaisa komokorera monto onde bwensi goetania ekerengo naboigo tobaisa gokora kende gionsi otari nobong’aini. ⅩⅩⅪ Onye kore nomokori emeremo tiga abe buna aye, ekiagera aye kwamogorete ase rigori nebigeri biao.