Ⅰ Omonto omoriri nigo agotwara ogosemeria kwa bosa na okwoborimo; chindoto nigo chikomoa omonto omoriri chimbaba oiruruka. Ⅱ Omonto okwegena chindoto nabo anga omonto okomonyokia omorengari gose embeo erio ayebwate. Ⅲ Okorota nabo konga ekerore, ekieni okorigereria ase obosio bwao. Ⅳ Ngento ki keranyaare gochenwa neubi? Inee, ekeene nkenyorekane ase oborimo? Ⅴ Koruta chinche, obomera n’echindoto noboriri; chiseemi nigo chikoba n’ebirengererio binga ebio omokungu okoibora. Ⅵ Tobaisa gochirengereria chindoto ase engencho ende yonsi otatiga rioka ekero chikorwa ase Omonene. Ⅶ Ekiagera chindoto chiabang’ainire abanto abange, na baria bachiegenete banyorire ogosookigwa. Ⅷ Amachiiko nigo are amaikeranu atabwati okongaineka okwo, n’obong’aini nigo bore oboikeranu ase omonto omwegenwa: Ⅸ Omonto otarire mono nigo amanyete amange, na omonto otwarire okwenaria amange nigo amanyete keria agokwana. Ⅹ Omonto otana koumerana na amakong’u ande onsi tamanyeti amange, Ⅺ korende ere oria otaarire mono bwenyoreire obomanyi. Ⅻ Ase ogotaara kwane neroreire amange; nigo imanyete kobua buna indanyaare gokwana. ⅩⅢ Ase ebiro ebinge nabeire ase obokong’u bw’ogokwa, korende naetire ase engencho yobomanyi obo. ⅩⅣ Baria bamoirogete Omonene ina babe moyo, ⅩⅤ ekiagera ogosemeria kwabo nigo kore ase ere oria okobatooria. ⅩⅥ Oria omoirogete Omonene takoba n’obwoba, takoiroka ekiagera Omonene nere ogosemeria kwaye. ⅩⅦ Nasesenirie ere oria omoirogete Omonene! ⅩⅧ Ekiagera ere nigo amorigereretie ere oria asemeretie. ⅩⅨ Omonene nigo akobarigereria ase obuya baria bamwanchete. Ere nenguba embibo na ogosemeria kwabo ogokong’u; ere negekengero kiabo korwa ase omwaga omotindi, nekiriri kiabo ase omobaso ogwoka; ere nigo akobarenda tibanyara korichaniwa, obakoonya tibabaisa kogwa. ⅩⅩ Omonene nigo agoichoria emioyo omogooko, na koyabeka amaiso oborabu. Ere nigo akobaa abanto obomenyo obuya, obomoyo na ogosesenigwa ⅩⅪ Ekero omonto akorua ebiegwa korwa ase okonyora kwobong’ainereria, ekeng’wanso kiaye nigo gekoba nekemoa. Okorua kwa abanto batari abaigweri tigwancheiri. ⅩⅫ Omonene tari gwancha chisadaka chi’abaanto batamoirogeti, gose obonge bw’okorwa tigokorenta okobwatanigwa. ⅩⅩⅢ Ere oria okorua esadaka yegento keria akobaura abataka nigo egwekaine omonto okomoita omwana ase obosio bwa ise. ⅩⅩⅣ Endagera y’omotaka nero obogima bwaye; onde bwensi okomoibera omotaka endagera oyio nomoiti. ⅩⅩⅤ Komoura omoamate endagera okwo nokomoita; na komorina omokori emeremo ogoakanwa kwaye okwo nokomoita. ⅩⅩⅥ Omonto oyomo araagaacha noyonde atagore, inee natware okonyoora konde goetania goitera ebigeri?