Ⅰ Otokwere mabera aye Omonene Nyasae o bonsi. Ⅱ Bikore ebisaku bionsi bikoiroke. Ⅲ Imokia okoboko kwao mamincha yebisaku binde, obikore birore okobua kw’obonene bwao. Ⅳ Buna koreng’ana gwatotomete intwe koorokia obochenu bwao ase bare barabwo; boigo bono toorokie okobua kwao goetera ase bare barabwo. Ⅴ Barabwo boigo inabamanye buna intwe tomanyete, buna taiyo naende Omonene Nyasae onde goetania aye Omonene. Ⅵ Naende bono kora ebikone amo nebimanyererio binde; Ⅶ gokore okoboko kwao kobe igokore n’ogotogigwa kegima. Ⅷ Orokia obororo bwao,, itera ekeririanda kiao; Ⅸ basirie abaengereria, na kobatinyia ababisa. Ⅹ Ayereria rituko erio naende oinyore ogotiana kwao; obakore abanto bateebe igoro yamakora ao yogokumia. Ⅺ Tiga onde bwensi oyio oraminchorie asambwe nekeririanda kiao ekenene, na baria bakobachaanda abanto bao banyoore ogoitwa. Ⅻ Basenyente abanene ba ababisa bao abwo bagoteeba; “Onde taiyo naende otatiga intwe abanyene!” ⅩⅢ Bisangererie ebisaku bionsi bia Yakobo, ⅩⅣ Oichorie Hekalu yao ere ase egetunwa gia Sayoni obonene na amateera y’okogotogia. ⅩⅤ Eorokie ase abanto bao, abwo gwatongete korwa omochakano; oikeranie obobani bwao obwo gwatorete ase erieta riao. ⅩⅥ Obae ebiegwa biao kwaroberetie korwa omochakano na tiga ababani bao baegwe amasikani. ⅩⅦ Obarorere amaabera abanto abwo bakorangerigwa ase erieta riao; Abaisraeli abwo kwarogete omwana oo omoisia omotangi. ⅩⅧ Oyokwere maabera omochie oyio ase Hekalu yao ere, Yerusalemu omochie oo bw’ogotimokera. ⅩⅨ Oyoichorie omochie o Sayoni omochengo bwamakora ao y’ogokumia, erio Hekalu yao eichore obonene bwao. ⅩⅩ Obaikeranerie abanto bao abwo gwatongete ritang’ani na goikerania obobani obwo gwakwanete ase erieta riao. ⅩⅪ Obae ebiegwa baria bakoganyete, erio ababani bao barorekane buna barabwo nabegeenwa bare. ⅩⅫ Aye Omonene, otegerere ogosaba kwa abakoreri bao, koreng’ana n’ogosesenia kwa Aroni igoro ase abanto bao. Erio Mwanyabaanto bonsi ase ense bamanye aye naye Omonene, bwe chingaki chionsi. ⅩⅩⅢ Endagera ende yonsi nabo eranyaare koriegwa, korende nereo endagera ere engiya kobwa eyende. ⅩⅩⅣ Buna oromeme rokoigwa obuya bwogwansa gwechindaagera, naboigo nomonto ore nechiseemi akonyaara gwatanana amang’ana yoborimo. ⅩⅩⅤ Oria obwate obongo bw’ebirengererio ebibe nigo akorenta omoichano korende ere oria onarete obogima goika amoakane buna egwenerete. ⅩⅩⅥ Omokungu nabo aranyare konywuomwa nonde bwensi, korende nareo omoiseke oyomo omuya kobua oyonde.