Ⅰ Kera omonto nabo aranyare goteeba, “Inche ninche omosaani oo.” Korende abasani bande nigo bare abasani ase erieta. Ⅱ Inee, teri amaakwa y’amakweri ekero momura omino gose omosaani akoba omobisa? Ⅲ Aye okoroberia obobe, ninki kiagerete ogatongwa goika oyeichorie ense noborimo? Ⅳ Abande ase abanto bamwabo nigo bakogokera omogooko bw’obosaani, korende ase chingaki chi’obokong’u bamotiga. Ⅴ Abande nigo bakomokoonya omosaani ase engencho y’endagera korende ekero esegi ekoba, beegerera boka abanyene. Ⅵ Tobaisa komweba omosani oo bw’ekeene; na ekero orabe omonda tomotinyia korwa ase enkoro yao. Ⅶ Kera omoseemia narue oboseemia korende abande nigo bakorua oboseemia ase okwenyorera ayabo. Ⅷ Orende buya igoro yomoseemia, otuke kegima riria origetie ase oboseemia, ekiagera nabo erabe ere nigo erengereretie omonyene. Nabo erabe oroisirie omoroberio asore. Ⅸ Nabo ere arabaisa kogoteebia: “Bionsi mbuya bire”, erio atenene egeka korora riria rigokonyoora. Ⅹ Tobaisa korigia oboseemia korwa ase omonto ore nechitang’utang’u nere, na tobaisa komoseemia omonto okomogorerete. Ⅺ Tobaisa korigia oboseemia ase omokungu korwa ase omobisa oye, torigia oboseemia korwa ase omonto omwoba igoro y’eseegi, gose omoonchoreria ase oboonchoreria, gose omogori ase oboonia bw’ebinto, gose omonto omong’iti igoro y’oboitongo, gose omonto omotindi igoro yobwororo, gose omonto omworo igoro yemeremo, gose omosomba omworo igoro yemeremo emekong’u. Aye tobaisa kobakumeria abanto bengeencho eyio, ase ring’ana riokonyoora oboseemia. Ⅻ Korende aye ase kera engaki obe noboamate nomonto omoirogete Omonene, oyio aye omanyete buna nkoigwera are amachiiko, oyio mokoigwana nere, oyio oragoichanere aye ekero okobugwa. ⅩⅢ Semeria mono oboseemia bw’enkoro yao; ekiagera monto taiyo omwegenwa kobua enkoro yao. ⅩⅣ Ase ebiro ebinge enkoro yomonto nigo ekomoa omonyene oboseemia obuya goika ara gatano na kabere kobua abarendi bensinyo bakorenda ase okoererania. ⅩⅤ Ase onsi, omosabe Omonene erio ayerae enchera yao ase ekeene. ⅩⅥ Obong’aini bobe omochakano o kera ring’ana ogokora, na oboseemia botang’anere emeremo ende yonsi. ⅩⅦ Ebirengererio bionsi nigo bire ase enkoro na korwa aroro ebinto biechingeencho inye nao bikororekana: ⅩⅧ Obuya nobobe, obomoyo na amakweri; na eki gekogambera ebio bionsi noromeme. ⅩⅨ Omonto nabo aranyare koba nobong’aini na abe omworokia bw’abange, korende ere taba nengeencho gochia asare ere omonyene. ⅩⅩ Omonto ore omwoge ase ogokwana nabo arabe okogeechia nonya ngoika ase akoborwa nonya nendagera akoria; ⅩⅪ ase engencho atanyoreti amaabera ase Omonene, ekiagera ere atabwati obong’aini bonde bwonsi. ⅩⅫ Oyonde nabo agotwara obong’aini ase okwegwenera ere omonyene, na koyarora amang’ana aye koba amaikeranu. ⅩⅩⅢ Omonto omong’aini nanyaare kobaseemia abanto baye, na ayakobwatekana nobomanyi bwaye abe amaikeranu. ⅩⅩⅣ Omonto omong’aini natogigwe ase obonge, na bonsi abarabe bakomorora inabamoroke omonyagesio. ⅩⅩⅤ Amatuko yobogima bw’omonto nigo abarire korende amatuko a Israeli tari nomobaro. ⅩⅩⅥ Omonto omong’aini nenyorere esiko ase abanto bamwabo, nechinkuma chiaye nchibeo ase amatuko atakoera. ⅩⅩⅦ Aye omwana one, bwerenge omoyo oo ekero ore moyo; okerore ekere ekebe asore okiebachere. ⅩⅩⅧ Ekiagera tari kera egento kemogwenerete kera omonto gose tari kera omonto okogokera kera egento. ⅩⅩⅨ Toba oyogosanera kera ebinto bi’okwegokia, gose toba omosomba bw’endagera. ⅩⅩⅩ Ekiagera okoria okonge nigo gokorenta oborwaire, enda embe nigo ekorenta ogosareka kw’omoyo. ⅩⅩⅪ Abanto abange bakuure ase okoria bobe, oyokwebachera obonyandambe, ere natambeyie obogima bwaye.