Ⅰ Omoe omogwenia esiko yaye emogwenerete, ase engencho yemeremo agokora asore, ekiagera ere boigo atongetwe n’Omonene. Ⅱ Ekiagera ekeegwa kiaye kioborwaria nigo kerwete ase Omonene; nere nigo akonyora ekeegwa korwa ase omorwoti. Ⅲ Obomanyi bwomogwenia nigo gokomorentera okomanyekana, nere nigo akonyoora esiko ase egati ya abanene. Ⅳ Omonene nigo atongete amariogo onsi korwa ase riroba, na omonto omong’aini takonyaara koyasiereria. Ⅴ Inee, tari ase enyimbo amaache aonchoretwe agakorwa amaya erio Omonene aborokie abanto Chinguru chiaye? Ⅵ Omonene nigo abaete abanto chiseemi nobomanyi, erio ere atogigwe ase emeremo yaye yogokumia. Ⅶ Ere nigo akobagwenia abanto ase amariogo na kobaruseria obosareru; Ⅷ omwochogania amariogo nigo akoroisia ogwochoganigwa kwaye. Emeremo y’Omonene teri nomoerio; obosera bw’emebere ase ense nigo bokorwa ase are ere. Ⅸ Aye omwana one, ekero orarware tobaisa koba omworo ase engencho yoborwaire, korende omosabe Omonene nere nakogwenie. Ⅹ Tiga amamocho ao, bwerwe gokora amaya, na gochena enkoro yao korwa ase ebibe biechingeencho chionsi. Ⅺ Omorwere Omonene ekeng’wanso kiogosambwa kierimisu rigiya, nekeng’wanso ki’obosie obonuke gi’okoinyoria. Obiiterere ebing’wanso biao amaguta koreng’ana nokonyoora kwao. Ⅻ Erio ayande oyatigere omogwenia; ekiagera Omonene nere omotongete tobaisa komotiga arue asore ekiagera nomoganetie. ⅩⅢ Ebiro mbire ekero okogwena kogoetera ase omogwenia. ⅩⅣ Ekiagera barabwo boigo nigo bagosaba Omonene abae okonyaara ase oboringoria bwabo, ase okogwenia ase ogotoria obogima. ⅩⅤ Omonto ogokora ebibe mamincha yomotongi oye, motige agwe ase amaboko yomogwenia. ⅩⅥ Aye omwana one, omoreere omonto oria okuure; rera ase obororo bworokie amayianda ao. Oyobogorie omobere oye ase amasikani agwenerete gose aye tobaisa gosiereria ogotindekwa kwaye. ⅩⅦ Orere ase obororo nenkoro yao, oikeranie ebirero buna egwenerete ase oria oraarire, okubie amatuko abere goika atato tobaisa gocha goteebwa; erio eremigwe korwa ase ogoichana kwao. ⅩⅧ Ekiagera omoichano nigo okorenta amakweri, n’omoichano bw’enkoro nigo okonyunyunta chinguru chi’omonto. ⅩⅨ Ekero omonto arure ase ense, omoichano oye nigo okoera, korende obogima bw’obotaka nigo bokoremaria enkoro. ⅩⅩ Aye tibwanchera enkoro yao egamberwe nomoichano; oyoserie omoichano erio aye korengereretie omoerio oo. ⅩⅪ Tobaisa kweba buna okoirana magega tikoiyo, tokonyaara komokoonya nyagosira gento kende naende nigo ogwechaanda aye omonyene. ⅩⅫ Oinyore buna naye nokwe buna ere akuure, igoro nere, ankio naye. ⅩⅩⅢ Ekero nyagosira akobekwa ase ogotimoka ime ase oboina, okomoinyora gotigwe, naye tobaisa kogenderera komoreera ekero omoyo oye orure aroro. ⅩⅩⅣ Ebiro nigo bikomoa omosomi chingaki chikonyoora obong’aini, omonto obwate emeremo emeke nabo aranyare konyoora obong’aini. ⅩⅩⅤ Inaki omonto ore ase obokombe riika aranyare koba nobong’aini? Omogooko oye nogotema chiombe na gochiraa chikuruure obokombe, boigo chinkwana chiaye chionsi nigo chibogoretie amang’ana yobotugi! ⅩⅩⅥ Ebirengererio biaye nogotema chiombe mogondo na korageria chimoori chiaye. ⅩⅩⅦ Naboigo ere ase kera omokori emeremo nomobachi onde bwensi ogokora emeremo obotuko n’omobaso; abakobaacha amagena bakorigia chinchera chinyia; nigo bagokora omokia koroisia emegwekano emiya boigo bageesa goika botuko ase ogokoora emeremo yaabo. ⅩⅩⅧ Boigo nomoroisia ebioma ase eriiko riaye ase agosunyuntera ebioma nigo akorengereria keria agokorera ebioma biaye; ere nigo agosambwa nomorero, ogiramora na koremereria riberera, eriogi riogokong’onta nechinyundo riasaria amato aye, na gotogoria amaiso aye gochia ase ekioma keria akoroisia. Ere nigo abegete enkoro yaye ase ogokoora keria akoroisia ase oborigereria obonene goika atabokie omogwekano oria arigetie. ⅩⅩⅨ Boigo omoroisia chinyongo ase emeremo yaye, ere nigo akorirundia rigari ase okogoro kwaye, ere nigo arendete emeremo yaye goika ogeesa erio aikeranie ekerengo giechinyongo keria keganeirie. ⅩⅩⅩ Ere obomba-bomba esike ase amaboko aye erio oyetacha na amagoro aye. Obeka ebirengererio kegima ase ogokoora emeremo yaye naboigo oba aroro goika nonya mbotuko gochena ekeoreri kiaye. ⅩⅩⅪ Abwo bonsi nigo basemeretie amaboko abo, na kera oyomo nigo are nobomanyi ase emeremo yaye. ⅩⅩⅫ Batabeti aroro omochie tokoagacheka; na abanto tibakoyotaarera gose komenya aroro. ⅩⅩⅩⅢ Nonya nabo, abanto aba tibari gosoa ase ebigambero ebinene gose koegwa obonene ase egeikaranso ki’omosangererekano. Barabwo tibari abanachi ebiina gose tibari nobomanyi igoro yokonachwa ebiina. ⅩⅩⅩⅣ Tibakonyara gotebereria okonachwa ebiina okwo gose tibana kororekana bagokwana emereng’anio.