Ⅰ Korende ere oria okorigia kweorokereria amachiiko y’Omonene, nigo akorigia obong’aini bwa abakoro, na boigo gotunyana aria akwanetwe na ababani. Ⅱ Ere nigo akogacha chinkwana chia abanto abasike, na gotegora chimbachero chire ime ase emereng’anio. Ⅲ Nigo akounenkia chingeencho chibisegete ase emereng’anio, nechimbachero chinkong’u tichiri egento ase ere. Ⅳ Ere nigo akobakorera abanene, na gwesookia ase obosio bwa abarai; nigo agotaara ase chinse chia isiko naboigo bw’emanyeire obuya nobobe bwa abanto. Ⅴ Nigo akoboka mambia chuni ase okwerua nomokia ase okomosasiima Omonene oyio omotongete; nigo akomoirera Omonene ogosaba kwaye, oigora ebikoba biaye ase ogosorora naboigo gosaba amaabera ase amamocho aye. Ⅵ Bun’Omonene ore omonene kegima arigetie, ere nigo akomoichoria omonto oyio obong’aini, nere naitororoke amang’ana yobong’aini na komoakera buy’Omonene ase ogosaba kwaye. Ⅶ Ere nayabogorie amorokererio nobomanyi bwaye buya, na korengereria mono igoro y’obobisi bw’Omonene. Ⅷ Naorokie obomanyi bwaye eorokereirie, na gwetogeria ogochika n’okobwatana kw’Omonene. Ⅸ Obomanyi bwaye inabotogigwe nabaanto abange, naborobwo obwo tibokwebwa nonya ng’ake. Chinkuma chiaye tichigosira, nerieta riaye inarinyorwe ase ebiare bionsi. Ⅹ Ebisaku inabirarie obong’aini bwaye, na emeganda y’abanto inayatore ogotogigwa kwaye. Ⅺ Ere namenye obogima obotambe, natige erieta rikumete kobua bonsi; nayio nabe amoisanire ere ekero arakwe. Ⅻ Ninde nayande amange ayio inche narengereirie ndakwane koreng’ana buna omotienyi orabire kegima. ⅩⅢ Montegerere inwe abana abaya, mosiiche buna ebisicha bia amaua y’obwanchani ayio asimekire rooche mbarabare. ⅩⅣ Sokia rimisu rigiya buna eriekoroso na gosiicha buna amaua yamagoma. Siarera rimisu riaino ase amateera yogotogia mobake Omonene ase amakora aye onsi. ⅩⅤ Togia obonene bw’erieta riaye, motogie goetera ase chingeero chikomotogia, momotogie ase ebikoba biaino namakano. ⅩⅥ “Rora ebinto bionsi nigo biatongirwe n’Omonene ekiagera birobio nebiya mono. Kera keria achiikire, kerokio inagekoreke ase ebiro biaye.” ⅩⅦ Tobaisa koboria “Ngento kieke?” Gose, “Eke negiaki?” Ekiagera intwe inatwegere ebio bionsi ase chingaki chi’Omonene. Ase ring’ana riaye, amaache nigo agotiga goiteka yebekerania; ase ogokwana kw’omonwa oye amaache nigo amenyete ime ase ekiage kiaye. ⅩⅧ Ase ogochika kwaye kera keria arigetie nigo kegokoreka, onde taiyo oranyaare gokeyia chinguru chiaye chi’ogotoria. ⅩⅨ Amakora yebitongwa nigo are maiso marore ase are ere, kende tikeiyo keranyaare kobiseka korwa ase obosio bwaye. ⅩⅩ Ere nigo akorora kare na kare na tikeri egekone ase ere. ⅩⅪ Tobaisa kobooria “Nkieke?” Gose “Eke negiaki?” Ekiagera kera egento nigo getongire ase emeremo yaye. ⅩⅫ Ogosesenia kwaye nigo kogoichoria ense enyomo buna ase orooche na gochinyiyia buna chioro chia amaache. ⅩⅩⅢ Endamwamu yaye nebiseerie ebisaku, buna koreng’ana akoonchora amaache amaya aba ay’omonyo. ⅩⅩⅣ Chinchera chiaye nigo chire chindonge ase baria bamoirogete, korende ase baria ababe chinchera chiaye nigo chire nebitango. ⅩⅩⅤ Ere Omonene nigo atongete ebinto ebiya ase baria bare abaya korwa agwo omochakano bw’ense, korende ase baria ababe ere nigo atongete ebinto ebiya naboigo ebibe. ⅩⅩⅥ Okogania kwengeencho ase Mwanyabaanto na amaache, omorero, ebioma nomonyo,; obosie, amabeere, oboke, edivai amaguta nechianga. ⅩⅩⅦ Ebi bionsi nigo bire ebinto ebiya ase baria bamosigete Omonene, korende birobio nigo bikoonchoka biaba ebibe ase abanyabibe. ⅩⅩⅧ Nchireo chimbeo chiatongetwe kobaa abanto egesusuro, na chirochio ekero chiabeire nigo chikorwa egesusuro ekenene. Ase chingaki chikiina, nigo chikoorokia okobua kwaye ase ogotoereria endamwamu y’Omotongi obo. ⅩⅩⅨ Omorero, embura yamagena, enchara n’oborwaire; ebi bionsi nigo biatongetwe bibae Mwanyabaanto egesusuro. ⅩⅩⅩ Amaino yeching’iti chintindi, amaagaga nechingeenda inse, naboigo omoro okobaa egesusuro baria batamoirogeti Omonene ase ogoita. ⅩⅩⅪ Bionsi nigo biraikeranie ogochika kw’Omonene; inabibe ang’e ase ense komokorera emeremo, na ekero ebiro biraike tibikogenda mamincha nogochika kwaye. ⅩⅩⅫ Inche nabeire nobomaene igoro ya ayio onsi korwa omochakano; nayarengereirie na koyaitona ase okoyariika. ⅩⅩⅩⅢ Emeremo y’Omonene yonsi nemiya, ere nigo akobaa abanto amagania abo ase ebiro bigwenerete. ⅩⅩⅩⅣ Tobaisa goteeba: “Egento eke nekiya kobua keria,” ekiagera ebitoki bia kera ekemo mbirorekane ase ebiro bigwenerete. ⅩⅩⅩⅤ Ase igo bono, tera ogotogia ase enkoro yao yonsi na koritogia erieta ri’Omonene.