Ⅰ Emeremo emerito nigo yatongetwe ase Mwanyabaanto bonsi, chigurube chindito nigo chire ase Mwanyabaanto bonsi korwa engaki baiboretwe goika ekero barairane sobo ase orotu, orwo narwo ng’ina abanto bionsi. Ⅱ Obwoba n’okwegosa kwabo gw’enkoro nokoiroka kwabo nigoro yerituko riogokwa. Ⅲ Ayio nigo akobanyora bonsi: korwa omorwoti ase obonene bwaye goika ase omwere oria ogoikaransa ase eubi na ase riibu; Ⅳ korwa ase omonda nechianga chiaye chimonyinga nekegogwa ase omotwe oye, goika ase omotaka okwambara chigunia. Ⅴ Kera ekemo nemoko nekeririanda, obokong’u n’omoichano, obwoba bw’amakweri, obobisa n’eriomana. Goika nonya nekero omonto akoraara ase oborere bwaye chitoro nigo chigwochogania ebirengererio biaye. Ⅵ Nigo akoraara chitoro chinke gose takoraara nonya ng’ake; naende nonya nekero araire nigo anga buna oria orooche. Ere nigo agochaandwa nemegwekano ase ebirengererio biaye, buna omonto oria otamire korwa bosio ase ogoitwa ase esegi. Ⅶ Ekero agotorigwa, obooka, oichana buna obwoba bwaye tibobwati ekeene. Ⅷ Nabo ere igo ase ebitongwa bionsi, ching’iti amo na Mwanyabaanto naende nigo ere boigo ara gatano na kabere ase omonyabibe: Ⅸ Amakweri kera engaki, ogoitera amanyinga, ogoitana neseegi, amakweri, enchara, emechaando na amarwaire. Ⅹ Ebio bionsi nigo biatongetwe ase engencho ya abanyabibe, etoigo nigo yachete ase engencho yababegu*. Ⅺ Ebinto bionsi biaruete ase riroba mbirane naende ase riroba, buna boigo amaache onsi akoirana gochia ase enyaancha. Ⅻ Kera riaki nobobe, inabitinyigwe, korende okwegena okuya inakobeo ase ebiro bitakoera. ⅩⅢ Enibo yababe nekamoke buna orooche, inayateke buna ogotitira ase engaki y’embura enyinge. ⅩⅣ Omonto omoitongo nanyoore omogooko, korende abamochi inabasire kegima. ⅩⅤ Abana ba baria batamoirogeti Omonene Nyasae tibakoba nomoseboko, barabwo nigo banga emeri emerosu ere ime ase egetare ekiomo. ⅩⅥ Emerande ere mbarabare ase amaache gose orooche eyio nero egochia gotanga korusigwa aroro obonyansi bonde bwonsi botararusigwa aroro. ⅩⅦ Obuya nigo bonga omogondo bw’amaua oichire ogosesenigwa, n’esadaka ase omonto omotaka nigo ekomenya amatuko onsi. ⅩⅧ Ase omonto oria bwetenenerete na omokori emeremo boigo, obogima nobuya; korende amaya abuete ayio nomonto oria onyorire obobisi bw’emonga. ⅩⅨ Okoba na abana amo noboagacho nigo bikomoa omonto esiko, korende omokungu otari na komocha nigo abuete ebio bionsi bibere. ⅩⅩ Ebinyugwa bigotindia amo nechingeero chi’okogokia nigo bikomosasokia omonto, korende gwancha obong’aini nigo kere egento ekiya kobua ebio bibere. ⅩⅪ Esirimbi amo nekenanda nigo bikorua eriogi rigiya ase ogoteera, korende eriogi riokogokia nigo rire rigiya kobua. ⅩⅫ Amaiso nigo akogokia ekieni nobuya bw’omonto, korende obuya bwokomera gwechintetere nigo boetanetie onsi. ⅩⅩⅢ Abasani na abanto abamo nigo bare abengeencho mono korende okobwatana kw’omokuungu nomosaacha oye nigo kore okuya kobua. ⅩⅩⅣ Okoba na abamino na gokonyana ase chingaki chi’obokong’u negento ekiya, korende ogokonya abataka nigo kore okuya kobua. ⅩⅩⅤ Etaabu nechifeta nigo bikomokong’ia omonto, korende amorokererio amaya nigo abuete ebio bibere. ⅩⅩⅥ Enibo nokobua nigo bikomokong’ia omonto, korende okomoiroka Omonene nokuya kobua. Ekemoa tikeri ase okomoiroka Omonene, oise koba nekeegwa ekio, aye tokogania obokonyi bonde. ⅩⅩⅦ Okomoiroka Omonene nigo konga omogondo bw’amaua osesenirie, nakorokwo nigo gokomorenda omonto kobua obonene bonde bwonsi. ⅩⅩⅧ Aye omwana one, tobaisa komenyera obogima bw’ogosaberera, nigo ere buya aye okwe kobua gosaberera. ⅩⅩⅨ Ekero omonto akomosemeria oyonde amoe endagera, ere nigo akomenya obogima botagwenereti Mwanyabaanto. Ogosemeria endagera y’omonto onde nokwea obosooku; omonto oorokereirie naende omong’aini, ere nigo akobwebachera obogima bonga buna obwo. ⅩⅩⅩ Ase omonto otari negesookero, ogosaberera nigo kore asere ogwansu, korende ime yaye nigo oreo omorero okomosaamba.