Ⅰ Aye amakweri! Ogokoinyora nobororo obonene, ase omonto ore moyo oyio omenyete nomorembe ase enibo yaye; ase omonto otari kwegosa, oyio okonyaara kera ring’ana, boigo ere oria ore nechinguru chi’okwegokeria endagera yaye. Ⅱ Aye amakweri! Ekiina kiao nigo kere ring’ana rigiya ase omotaka oria ore birati boigo oereirwe chinguru, ase omonto omogaka oria ogweichandera kera ring’ana, omonto ore nobosareru boigo oereirwe okoremereria. Ⅲ Toiroka ogweitia kwa amakweri; oinyore baria bagotang’anerete na baria baragotunyane. Ⅳ Oyio nomoroberio Omonene ase ebitongwa bionsi. Ninki keragere oamereranie na keri’Omonene anchete goetia? Okomenya emiaka rigana gose elifu teri engencho ase purigatori. Ⅴ Abana ba abanyabibe nokogechia; barabwo nigo bakona koombogana ase emechie etamosigeti Omonene. Ⅵ Omwando bw’abana ba abanyabibe nosire, boigo oroiboro rwabo inaromenye ase obosooku kare na kare. Ⅶ Abana inabamoragererie ise oria otamoirogeti Omonene, ase engencho yobosooku akobarentera abana baye. Ⅷ Obobe nobwaino, inwe baria motamoirogeti Nyasae Ore Igoro Mono, inwe baria mwatigire ogochika kw’Omonene! Ⅸ Ekero morasesenigwe, okonyora kwaino inagosire; ekero moragoochwe timokoimoka naende; na ekero morakwe, okoragererigwa nakwo moranyore inwe. Ⅹ Kende gionsi gekorwa ase orotu, kerokio nigo gekoirana gochi ase orotu, ababe nigo bagochaakera okoragererigwa na gokorera obosiru. Ⅺ Abanto nigo bakoreera emebere yebitondo, korende erieta ribe ria abanto abanyabibe inarituguterwe are. Ⅻ Aye oria erieta riao ri’esiko ekiagera rirorio inarigotigarere, inarimenye goetania emonga elifu eyemo y’echitaabu. ⅩⅢ Ebiro bi’okwegokia nigo bire nechingaki chinke igo, korende erieta rigiya nigo rikomenya amatuko atakoera. ⅩⅣ Abana baane, tegerera amorokererio aane momenye nomorembe. Obong’aini bobisegete na emonga etari kororekana, inee ebio ninki bibwate? ⅩⅤ Nigo ere buya ase omonto obisete oboriri bwaye, kobua oria obisete obong’aini bwaye. ⅩⅥ Aye oyasike amang’ana aane; ekiagera teri buya orore obosooku ase kera egento na tari kera egento kegwancherwa na kera omonto. ⅩⅦ Aye obe nobosooku ase ogokora amang’ana amabe ase obosio bwa abaibori, ase ogoteeba oborimo ase obosio bw’omonene gose omogambi; ⅩⅧ ase okomocha ase obosio bw’omonachi ebiina, na ase ogokora obobe ase obosio bw’emeganda; ⅩⅨ ase okomong’aina oyomino ase emeremo gose omosaani, ase okoiba ase aye omenyete. ⅩⅩ Orore obosooku ase okoborwa obwegenwa ase Omonene na okobwatana kwaye, igoro yokoborwa amasikani ase endagera; ⅩⅪ ase okoba omong’iti ekero ogosabwa egento, ase ogokira ekero ogokwanigwa, ⅩⅫ ase okomorigereria omokungu omotaayayi, ase okwanga komokoonya omonto bw’eamate yao; ⅩⅩⅢ ase okomounereria omonto enibo yaye, gose ase okomomogorera omokungu bw’omogisangio oo.