Ⅱ
Omoyega bw’enka
Ⅰ Bono ekero nairanete inka bwone nkaegwa omokungu one Anna n’omwana one Tobia, ngakorerwa omoyega omonene ekero rituko ria Pentekosti riaigete erio riare rituko rinene ase chichuma isano na ibere. Ekero naikaransete ase emesa nigo narooche chindagera chinyinge chibeekire ase emesa eyio.
Ⅱ Erio ngatebia Tobia omwana one “Genda aria isiko ase abanto bainto orore gose nonyore omotaka ase egati y’abanto baito oyio omoirogete Nyasae omorete aiga toragere amo nere. Rora inche nakoganyire.”
Ogoita ime ase omochie o Nineva
Ⅲ Erio Tobia akagenda korigia omonto omotaka korwa ase egati y’abanto baito. Ekero airanete aganteebia “Tata! Rora nanyorire oyomo bw’abaanto baito oitire na gotugutwa aria echiiro!”
Ⅳ Erio erio nkaimoka konya ntararia nonya nendagera eria, nkagenda nkaimokia omobere oria ’nkayogacha erio inche koyotindeka chinsa chia mogoroba;
Ⅴ erio nkairana ngesibia nkaria endagera eria n’okweumia.
Ⅵ Nkainyora obobani bwa Amos “Amatuko aino amanene yemeyega naochoke abe ay’okweumia, na amateera aino abe ebikuuro.” Erio ngachaka korera.
Ⅶ Ekero erioba riarimerete, ngasooka isiko nkarema oboina ngatideeka omobere oria.
Ⅷ Korende abaamate baane bagansekerera bagoteeba “Morigererie oyo! Tari kwooboa ekiagera aya agokora naro agerete ere are korigigwa aitwe korende ere agatama, na rora ochakire amang’ana aria aria!”
Tobiti ogoukorigwa
Ⅸ Emogoroba eyio nkairana ngesibia, nkagenda gesona mwane nkarara aroro na tinebisia bosio ase engencho riberera riarenge rinyinge mono.
Ⅹ Tinamanyete gose Chinchiro chiarenge kerama igoro ase naraire. Bono chinchiro echio chigansaera echabu yabo yarenge morero egasoa ase amaiso ane erio ebinto ebirabu bigasieka amaiso ane ngasinywa korora, erio nkagenda ase abarwaria ao ao korende onde taiyo onyarete gonkoonya na omoerio nkaba omouko ase emiaka ene ntari nkorora kende. Abaminto baganchandekera mono boigo na Ahika akandenda ase emiaka ebere erio akagenda Elamu.
Eriomana ri’enka
Ⅺ Ase chingaki echio mokaane Anna agachaaka gokora emeremo yogosona chianga buna abakungu bande.
Ⅻ Kera engaki ekero akorire gosona chianga nigo arenge koirera abanyene erio bamwakana chitaabu chiaye. Rituko erimo agasona eyanga erio akayeirera omonyene ere akamwakana chitaabu chiaye boigo akamoa akamanwa kembori buna ekeegwa.
ⅩⅢ Ekero Anna aigete inka nemanwa eria y’embori egachaka kwana, erio inche nkamoboria “Ngai kwarusia embori eyio? Nigo kwaiba? Yeiraneri omonyene! Tari buya koria endagera eibire!”
ⅩⅣ Anna aganteebia: “Yaya taibo emanwa eye nigo naegwa buna ekeegwa ase ogoakanwa kwane.” Korende inche tinamwegena; ’inkaba n’obosoku ase egekorwa ekio akorete. Inkamochika eyairanerie abanyene. Erio ere akang’iraneria! Ee bono! Aye ngokonya kware abataka gose tai bo? Aye gwakorete ngeto ki akoiraneirie? Aya akonyorete nigo are maiso marore!