Ⅲ
Ogosaba kwa Tobiti
Ⅰ Erio agwo ase obororo obonene ngachaaka korera ase okoiyeria amariga na gosaba
Ⅱ “Aye Omonene, aye nomonyakeene, ebikorwa biao bionsi nebiekeene; chingecho chiao nechiamaabera nekeene aye naye okogambia ense.
Ⅲ Bono aye Omonene, ong’inyore na kondigereria, tobaisa kong’a egesusuro ase engencho yebibe biane gose ase amamocho chisokoro chiane chiakoreete.
Ⅳ Barobwo tibabwatete amachiiko ao; ase igo ogatotiga tokang’anyigwa na goitwa. Ogatokora togasekererwa na tokaba obosooku ase ebisaku bionsi agwo ase twasiareretwe.
Ⅴ Chingaki chinyinge kwaeire chisokoro chiane egesusuro koreng’ana nebibe biabo boigo nainche kwang’eire egesusuro koreng’ana nebibe biaane. Nigo twatigete koigwera amachiiko ao na ase igo tokanyora egesusuro giaito giekeene.
Ⅵ Bono aye nkorere buna otagete. Rusia obogima bwane erio onsibore korwa ense eye. Ase inde mbuya gokwa kobua koba moyo, ase engencho nigo ’nkomochigwa ntabwati komocha; nerusirie moyo. Omonene ancha bono aye kondusia ase emechaando eye, ong’ire ase ogotimoka gwa kare na kare. Tibwanga koigwa ogosaba kwaane.”
Emechando ya Sara
Ⅶ Rituko erio erio, ase omochie o Ekbatana aria ase ense ya Media, Sara mosubati o Ragueli nere akaramwa noyomo bw’abasubati abakori emeremo ba ise.
Ⅷ Bono Sara konya onywomirwe ara gatano na kabere korende ekerecha keria Asmodeo nigo kiabete kegoita kera oyomo bw’abasaacha aba ekero banywomire magega batarara na Sara. Bono omosubati oyo omokori emeremo agateebia Sara: “Aye nomoiti tori korora nonya mbosoku kwabeire nabasaacha batano na babere korende onde taiyo nonya noyomo okoeire omwana.
Ⅸ Nase ki ogotounereria igaa? Genda gochia ariaa bwatia abasacha bao abwo bakuure. Mbuya titorora omwana bw’oroiboro rwao.”
Ⅹ Ekero Sara aigwete amang’ana aya akagechigwa mono agachaaka korera na koiyeria amariga, akariina enyomba ya igoro akarigia eite. Korende ekero arengereretie agateeba, “Yaya tingweita erio abanto bache gochaaya tata na goteeba, aye nigo kwabwate omwana oyomo enyaroka oyio gwanchete mono, korende ere ageita ase engencho yobororo! Ring’ana ringa buna eri nigo riragere tata oyio ogotire akwe bwango erio inche mbarerwe okomocha; bono inche nigo ’nkomosaba Nyasae Omobui aire enkoro yane erio timbaisa koigwa okorama buna oko rinde.”
Ogosaba gwa Sara
Ⅺ Erio Sara agatenena ase etirisa akaimokereria amaboko aye igoro na gosaba ogoteeba: “Otogigwe aye Nyasae one; ritogigwe botambe erieta riao richenu.
Ⅻ Na bono aye Nyasae Omobui naimokereirie amaiso ane gocha ase ore ’insemeretie buna aye nonkoonye.
ⅩⅢ Aye bono karwe ogochika erio inche indwe ase ense erio tinyigwa okoramwa oko naende.
ⅩⅣ Nomanyete aye Omonene buna inche nomoiseke omwekungi tinanakoba na mosacha onde.
ⅩⅤ Tindasaria erieta riane gose eria tata ominto aiga ase ense eye nanganyetigwe gocha. Ninche bweka omwana o tata ominto ere tabwati mwana onde orabe omonyamwando oye, gose tabwati onde obamwabo oranyare konywoma. Nasiririe abasacha batano na babere; nase ki ndagenderere koba moyo? Onye aye togwancha kondusia ase ense, ndorere amaabera. Tinkonyara koremereria koramwa!”
Nyasae okoigwa ogosaba gwa Tobiti na Sara
ⅩⅥ Ekero Tobiti na Sara bagendererete gosaba, Nyasae ore igoro akaigwa ogosaba kwabo.
ⅩⅦ Erio ere agatoma Omomalaika oye Rafaeli kobakoonya. Omomalaika oria akarusia ebinto biria ebirabu biarenge ase amaiso a Tobiti erio anyare korora naende akore emeroberio yenywomo gati ya Sara na Tobia omwana o Tobiti; Tobia nigo arenge omwana o momura omwabo Tobiti, oyio kobwatekana n’ogochika bwancheire konywoma Sara. Rafaeli boigo agachiika ekerecha keria Asmodeo ekio konya giachandire Sara kerwe ase are. Ase chingaki chiria Tobiti aimogete korwa gesona ase arenge Sara nere ngoika arenge korwa enyomba ya igoro ase arenge.