Ⅰ Rituko erio erio, Tobiti akainyora chitaabu chiaye echio atigerete Gabaeli aria Rege ase ense ya Media, Ⅱ erio akarengereria ase omoyo oye ime ageteebia: Ase engencho nasabire Nyasae inkwe, ninganeirie ’indangerie omwana one Tobia ’motebie igoro yechitaabu chiria magega ’ntarakwa. Ⅲ Erio akarangeria omwana oye Tobia akamoteebia, omwana one, ekero ’ndakwe, ontindeke buna ebwenerete. Bono aye goika omosike nyoko omorende buya ase obogima bwao bwonsi. Oikeranie amang’ana onsi ayio araganie omokorere naende tomogechia ase kende gionsi. Ⅳ Inyora omwana one buna nyoko achandegete gokoreta ase ense eye. Bono ekero nere arakwe, omotindeke ensemo agwo ase oboina obwo orantindeke inche. Ⅴ “Obe omwegenwa ase Omonene Nyasae oito amatuko onsi yobogima bwao. Tokora ebibe moeneno, gose tobaisa gosaria amachiiko aye. Kora ayare amaya ase obogima bwao bwonsi gose tobaisa kobwatia chinchera chi’obokorekanu.” Ⅵ Oyogokora amang’ana onsi ase obwegenwa nigo agosesenigwa ase obogima bwaye. Ⅶ Karue ensemo y’enibo yao ase abataka. Tobaisa korina omotaka kende gionsi naye Nyasae tagokorina kende gionsi. Ⅷ Karue biria ore nabio Korabe nebinge karue ebinge, neisakoba nebike obwate, karue koreng’ana nokonyora kwao. Ⅸ Ase ogokora igo nigo okwegachera ebinge ase chingaki chi’emechando. Ⅹ Ase engencho ogokonya omotaka nigo oretange korwa ase amakweri gose gosoa ase omosunte ime. Ⅺ Gokonya abataka ase baria bonsi banchete gokora bo nigo ere esadaka engiya mono ase obosio bwa Nyasae Omobui. Ⅻ “Omwana one, etange mono korwa ase obotomani goetenia onsi, nywoma omosubati korwa ase egesaku giechisokoro chiao. Tobaisa konywoma omosubati korwa ase abanto b’ebisaku ase engencho intwe negesaku ki’ababani. Inyora abagaaka buna Nuhu, Aburamu, Isaka, na Yakobo abwo bare chisokoro chiaito nigo banywomete abasubati korwa ase egesaku kiabo. Nyasae akabasesenia akabaa abana abwo bare oroiboro rwabo nabwo bagocha koira ense eria yomwando.” ⅩⅢ Ase igo bono aye omwana one, goika bwanche abamino. Tobaisa kwerora erio otige konywoma korwa ase abanto bamino. Obwerori bonga buna obwo nigo bokorenta ogosira okonene buna koreng’ana obworo bokoreta obotaka nenchara enene. Ase engencho obworo nabwo ng’ina y’enchara ⅩⅣ “Tobaisa kogacha eng’eria ya baria bakogokorera emeremo goika rituko rinde. Bae eng’eria yabo riimo rioka. Koramosike Nyasae, ere nakorende. Origererie buya kende gionsi ogokora, na obe namasikani ase orogendo rwao.” ⅩⅤ Tobaisa gokorera monto onde keria otaganie okorerwe. Tobaisa konywa edivai goetania ekerengo na gotinda; ogotinda tikoba ase ore. ⅩⅥ Obae endagera baria bare n’enchara, na baria bare getirianda obae chianga. Erwe gokonya abataka na ekero kwarure tiga kwemurungania; karue ase omoyo bw’gwancha. ⅩⅦ Ekero omonto omoirogete Nyasae akuure obae abanto b’enka yaye endagera, korende tokora bo ase omonyabibe. ⅩⅧ Rigia oboseemia korwa ase abanto abang’aini, naende tobaisa gochaaya oboseemia. ⅩⅨ Omotogie Omonene amatuko onsi. Omosabe, arongeyie chinchera chiao nagoikerania emeroberio yao yonsi, ase engencho obong’aini tibori ase kera ense. Nyasae omonyene nere okobaa amaya onsi. Ekero aganetie nigo akomoiyeria omonto nonya ngoika embera. Ase igo omwana one oinyore amang’ana ane naende toyatinyia korwa ase enkoro yao. ⅩⅩ Bono omwana one, nigo ntagete gokomanyia ng’a agwo kare ’naete Gabali omwana o Gabria chitaabu chinyinge aria Rage ase ense ya Media. ⅩⅪ Bono aye toba nobwoba buna intwe twabeire abataka. Koramoiroke Nyasae na otige ebibe bionsi nagokora ayakomogokia, aye nobe n’eniibo enyinge.