Ⅰ Erio Tobia akairaneria ise akamoteebia “Ninkore aya onsi gwanchiikire Ⅱ bono ng’aki ndakore ’nyore chitaabu echi gwantebia korwa ase Gabaeli ase engencho inche timomanyeti nere tamanyeti? ’Nkemanyererio ki ndamworokie erio anyare gwancherana na kong’a chitaabu echio? Goetania igo, inche timanyeti enchera ekogenda Media.” Ⅲ Erio Tobiti akairaneria omwana oye Tobia akamoteebia Inche, ntwariikeranete na Gabaeli togakora okobwatana erio togatandora ekaratasi eria gati gati ere akaira ekengese nechitaabu nainche ’nkaira ekengese kende, aya nigo twayakorete emiaka emeongo ebere (20) yaetire, bono aye genda origie omonto omwegenwa oyio oragokobe gochia Media nakoirana naye goika aiga. Ekero morairane tomwakane eng’eria yaye. Korende aye goika onyore chitaabu echio natigerete Gabaeli. Ⅳ Erio Tobia akagenda korigia omonto omanyete enchera ekogenda Media erio bagende nere. Erio agwo obosio ase obosio Tobia bakaumerana na Rafaeli. Tobia tamanyete ng’a Rafaeli nigo arenge omomalaika o Nyasae, Ⅴ erio akamoboria “Ngai okorwa?” Rafaeli akamoiraneria “Inche nomonto omino omoisraeli narwa aaree nacha aa Ninawi korigia emeremo.” Tobia akamoboria “Nomanyete enchera ekogenda Media?” Ⅵ Rafaeli akamoiraneria “Ee nimanyete. Nabeire nkogenda Media chingaki chinyinge ase igo chinchera chionsi ninchimanyete buya mono. Aria Media nigo namenyete noyominto Gabaeli oyio omenyete omochie o Rage. Rage n’ense yebitunwa ase eratoire amatuko ange abere gotara goika Ekbatana omochie omonene o Media.” Ⅶ Erio Tobia agateebia Rafaeli “Nganye aiga mosani one tiga ndarateebia tata. Nigo nganetie onkobe goika Media naiche ningoakane engeria ase orogendo oro.” Ⅷ Rafaeli akamoteebia “Genda korende totebana.” Ⅸ Tobia agasoa nyomba agateebia ise “Nanyorire omoisraeli ominto oyogonkoba ase orogendo rwane.” Tobiti akamoiraneria “Morangerie ache aiga. Ninganetie komomanya buya buna ere noyong’o naende noyogesaku ki, naende gose nomonto oregeenwe kogenda amo naye.” Ⅹ Erio Tobia agasoka isiko akarangeria Rafaeli agateeba, “Tata ngokorangeria are.” Rafaeli ekero asoete nyomba Tobiti akamokwania na Rafaeli akamokwania ase omogooko omonene. Korende Tobiti akamoboria, ng’aki eranyarekane imbe nomogooko naende? Inche nomouko tindi korora kende. Narimeire ime ase omosunte buna abakuure batarore oborabu naende. Igo enga buna nakuure igo nkoigwa abanto bagokwana korende tindi kobarora. Omomalaika akamoteebia Tobiti “Tokwa omoyo! Nyasae Nagosesenie obweene bwango iga, aye tochandeka ase enkoro!” Erio Tobiti agateeba “Omwana one Tobia nigo aganetie kogenda Media, inee, nonyare komokoba omworoki enchera? Toba nechitang’utang’u inche ningwakane.” Rafaeli akamoteebia nabo ’nkogenda nere, nachire aroro chingaki chinyinge na nigo manyete chinchera chionsi chiebitirimboko nebitiiro. Ⅺ Tobiti akamoboria nteebie ngo omwana ominto aye noy’omochie ki na egesaku kiao ’kereki.? Ⅻ Korende Rafaeli akamoboria “Nase ki oganetie komanya egesaku kiane?” Tobiti akamoteebia “Ekeene nindigetie gokomanya boigo nakomanya abaibori bao.” ⅩⅢ Rafaeli akamoteebia inche “Erieta riane na Asaria omwana bw’omogaka Anania, omino.” ⅩⅣ Erio akamoarigania buya akamoteebia “Tobaisa kogechigwa nainche ase engencho nakobooria igoro yabaanto bamino nigo natagete komanya buya mono igoro yororeria rwao, aye n’omwana ominto. Inche nimanyete Anania na Natani abana ba Shemelia barabwo nigo banchete kogenda amo nainche Yerusalemu gosasiima, abanto bamino nabaya mono.” ⅩⅤ Erio Tobiti akagenderera komoteebia, Inche ningoakane engeria yerituko boigo nagoakana chitaabu chinde echio oraganie gokorera kende ase orogendo. Bono nakoboririe ogende n’omwana one, ⅩⅥ na mokoirana buya inche ninkomente kende. Rafaeli akamoteebia, “Toba nobwoba kogenda tore na koirana buya enchera tokogenda tebwati mang’ana.” Tiga Nyasae n’omomaika oye babarende naende babairanie buya gocha ase inde. ⅩⅦ Tobiti akamoteebia oyominto, nakoganeirie ebisio bia Nyasae. Erio akarangeria Tobia akamoteebia, omwana one, beka kera egento keria moraganie ase orogendo erio oimoke aye n’oyomino mogende. Nyasae o igoro abarende abambokie buya na kobairania gocha aa buya. Omomalaika o Nyasae abe nainwe na kobarenda ase enchera. “Magega batarachaka orogendo gochia Media Tobia akanyunyuta ng’ina na ise, erio Tobiti akamoteebia genda buya.” ⅩⅧ Erio Anna ng’ina Tobia agachaaka korera agateebia Tobiti “Inki gekogera ogotoma omwana oito gochia aria are? Tomanyeti buna nere togotoma aiga? ⅩⅨ Tobaisa kogania chitaabu mono na kobeeka obogima bw’omwana oito ase akong’u; ⅩⅩ ase engencho obogima obo Nyasae atoire nigo botoisaine.” ⅩⅪ Tobiti akamoteebia, tokumia omwanchwa, omwana oito nigo aragende ’na koirana buya gocha ase tore. Aye nomorore n’amaiso ao. Aye tokwana kende gose gokumia omomalaika omuya namorende. Omwana oito nigo aragende buya na koirana buya atari na bobe bonde.