112
Enkabi gyʼomuntu omusa
1 Muwuuje oMusengwa!
Wʼenkabi iye oyo atya oMusengwa,
era iye oyo asangaalira eino mu kugondera biragirobye.
2 Abaanabe baabbanga bʼamaani oku kyalo.
Eibyaire lyʼomutuukirirye lyabbanga lyʼenkabi.
3 Amakaage gaabbanga masuni era gakulaakulananga,
era ebikolebye ebyobutuukirirye tibalibyerabira emirembe gyonagyona.
4 Omutuukirirye ekitangaala kimwakira nʼomu ndikiirya,
olwʼokubba abba wʼekisa, era alumirwa, era mwenkanya.
5 Ebintu byabira nakusani iye oyo akola ebyʼekisa era akoopa abainaye,
era omwenkanya omu byakola.
6 Mazima yaabbanga mucaati bulijo,
era bamwebukiryanga emirembe gyonagyona.
7 Tatya okuwulira amawuliro amabbimabbi,
omwoyogwe mugumu era yeesiga Musengwa.
8 Tatya, omwoyogwe mugumu,
paka oweyalibona ati abalabebe babawangwire.
9 Agabira abadoobi nʼomwoyo gumo.
Era ebikolebye ebyobutuukirirye tibalibyerabira emirembe gyonagyona,
bamugulumalyanga ni bamuwa ekitiisya.
10 Ekyo omubbimubbi akibona ni kimusunguwalya,
nʼanyayiya neye nga mpaawo kyokukola.
Okusairirya kwʼomubbimubbi tikwatuukirirenge.