113
Okuwuuja oMusengwa olwʼobusaabwe
1 Muwuuje oMusengwa.
Mumuwuuje, inywe abaweererya ba Musengwa,
muwuuje eriina lya Musengwa.
2 Eriina lya Musengwa baliwuuje,
okuzwa atyanu paka emirembe gyonagyona.
3 Okuzwera e buzwaisana okutuuka e bugwaisana
bali nʼokuwuuja eriina lya Musengwa.
4 OMusengwa niiye afuga amawanga gonagona,
era ekitiisyakye kikiraku eigulu.
5 Naani ali ngʼoMusengwa Iye oKibbumba waiswe,
Iye atyama oku ntebeye eyʼobwakabaka eri omwigulu?
6 OKibbumba niiye akotama nʼalingirira okubita
omwigulu nʼabona ekyalo.
7 Asetula abadoobi nʼabatoola omu nkungu,
asetula abadamba nʼabatoola oku kibbomboizi,
8 nʼabatyamisya aamo nʼabakungu,
aamo nʼabakungu abo abafuga abantube.
9 Awa omukali abula omwana eisangaalo omu kisitokye
nʼamusuuca omukali omubyaire.
Muwuuje oMusengwa.