138
EZabbuli ya Dawudi.
Okwebalya oMusengwa
1 Oo Musengwa, nakwebalyanga nʼomwoyo gwange gwonagwona,
ni nnyemba nga nkuwuuja omumaiso gʼabakibbumba.
2 Nakotamyanga omutwe okukuwa ekitiisya nga nningiriire eeri eYeekaaluyo entukulye.
Era nakuwuujanga
olwʼokutakakwo okutakoma nʼolwʼobwesigwabwo,
olwʼokubba wagulumairye eriinalyo nʼekibonokyo
okukiraku ebindi byonabyona.
3 Oku lunaku owenakusabireku wanjiriremu,
wanjiriryemu amaani nʼongumya.
4 Oo Musengwa, oleke abakabaka bonabona abʼoku kyalo bakuwuuje,
olwʼokuwulira ebibono ebizwa omu munwagwo.
5 Oleke bembe oku bikwata oku manzirago,
olwʼokubba ekitiisyakyo Musengwa, kyʼamaani!
6 Waire ngʼoMusengwa yagulumaire okukiraku nabuli kintu, afaayo oku bayeejere;
Neye abʼamalala, yabeesamba.
7 Nʼowemba aakati omu bigosi,
iwe okuuma obwomi bwange.
Olwanisya abalabe bange abandiku ekisungu,
nʼonnunula nʼamaanigo.
8 OMusengwa otuukirirya ebigendererwabye eeri nze;
Oo Musengwa, okutakakwo okutakoma kubbeerererawo emirembe gyonagyona.
Tiwandekesula nze oguwakolere.