139
Eeri akubbembera abembi. EZabbuli ya Dawudi.
OMusengwa atumaite era atulabirira
1 Oo Musengwa, waneekeenenyere
era ommaite.
2 Nʼowentyama era nʼowensetuka obba ommaite,
nʼowoobba e yala nanze ebiseego byange obitegeera.
3 Owempuluka nʼowenyingira, ontegeera,
omanya nabuli kimo ekinkola.
4 Nga nkaali nʼokubbutula ekibono,
Musengwa obba okimaitiire nakimo.
5 Oneeruguulirirya oku mba gyonagyona,
nʼonkuuma nʼamaanigo.
6 Okumanya okwo okwommaitemu
kwewunyisya, kumbitiriireku, timpezya okukutegeera.
7 Yaina e gimpezya okwaba ni nzwa eeri oMwoyowo?
Yaina e gimpezya okwirukira ni nzwa e gyoli?
8 Oweniina omwigulu, eeyo oliyo.
Owenjika ni ngona e magombe, eeyo oliyo.
9 Nʼowenguluka ni mbitawo nʼe buzwaisana,
ooba ni njaba ni ntyama e yala eino e bugwaisana,
10 nʼeeyo yona oliyo okunnungamya,
era oliyo okumbeera.
11 Nʼowensaba nti, “Dala endikiirya embuuneku,
era ekitangaala ekineeruguulirye kisuuke ndikiirya,”
12 nʼendikiirya yona tebba ndikiirya eeri iwe;
nʼobwire buboneca ooti musana.
Kwiwe endikiirya nʼekitangaala bifaanangana.
13 Niiwe owabbumbire ebitundu byange ebyʼomunda byonabyona,
niiwe owayungayungire ebitundu byange ebyʼomubiri omu kida kya mama.
14 Nkuwuuja olwʼokubba wankolere mu ngeri etiisya era eyeewuunyisya.
Ebikolebyo byewuunyisya ino,
era ekyo nkimaitiire nakimo ino.
15 Owebabbaire bakola amagumba gange,
nga bannyungayunga omu kida kya mama;
owenabbaire nga nkulira eeyo omu mbiso,
tikyabbaire kibise egyoli.
16 Wamboine nga nkaali okubba omu kida kya mama;
enaku egyʼobwomi bwange gyonagyona,
wagiwandikire omu kitabokyo
nga gikaali nʼokutandiikaku.
17 Oo Kibbumba, ebyonseegaku nga byomugaso ino!
Ebyonseegaku tibibalika!
18 Owemba kubibala,
bikira omusenye obungi.
Owendamuka
mba nkaali ndi na iwe.
19 Oo Kibbumba, kadi singa oita ababbibabbi!
Munzwerewo baiti inywe!
20 Bakutumulaku kubbikubbi,
abalabebo babona eriinalyo ngʼeritagasa.
21 Oo Musengwa, nga ncaawa abo abakucaawa,
era nga nnyooma abo abakujeemera!
22 Mbacaawira nakimo ino,
mbeeta balabe bange.
23 Oo Kibbumba onkebere, kaisi otegeere ebiri omu mwoyo gwange.
Onkeme, kaisi omanye ebiseego byange.
24 Obone ooba nga ndimu ekibbikibbi kyonakyona,
era onkubbembere omu nzirayo eyʼenkalaakalira.