140
Eeri akubbembera abembi. EZabbuli ya Dawudi.
Esaala eyʼobukuumi
1 Oo Musengwa, onnunule eeri abantu ababbibabbi,
ontaase eeri abaiti.
2 Ibo bategeka omu myoyo gyabwe kukola bubbibubbi,
tibagonerya kusiikuula ntalo.
3 Ebibono ebibazwamu byʼobulabe ooti mpiri omukambwe,
ebibono byabwe bikangabalya ooti saagwa wa nfulugundu.
4 Oo Musengwa, ontaase eeri abantu ababbibabbi,
ontaase eeri abaiti
ibo abakola entegeka eyʼokumpapalya.
5 Abeepanka bantegere omutego omu kyama,
bategere olutuula lwabwe
era bantegere emitego omu nzira.
6 Oo Musengwa nkoba nti, “Niiwe oKibbumba wange.”
Oo Musengwa, owulire okwegairira kwange, ombeere.
7 Oo Musengwa, iwe oMusengwa wange, omununuli wange owʼamaani,
niiwe onkuuma oku lunaku lwʼolutalo.
8 Oo Musengwa, tiwaawa ababbibabbi ebibataka,
tiwaganya entegeka gyabwe okubitamu,
bademba ni beewaana.
9 Tiwaganya abalabe bange okuwangula,
oganye ebyo ebibantiisyatisya bibakangire.
10 Oleke amanda agameigera gabagweku,
oleke babadyake omu musyo,
babadyake omu biina ebyabiriri, tibabizwamu naire.
11 Tiwaganya abo abali nʼentumula embiibbi okubbaaku nʼe gibabba oku kyalo;
oleke ekibbikibbi kiyiigenge mangu abakambwe ni kibajigirica.
12 Musengwa, mmaite ngʼotaasa abebajolonga,
era olwanirira abanambulaku obubbeeri.
13 Mazima abatuukirirye, bakuwuujanga;
era abʼemyoyo emirongoole basunanga obutyami omumaisogo.