141
EZabbuli ya Dawudi.
Esaala eyʼakanaigulo
1 Oo Musengwa, nakwekungirira, oyanguwe okumbeera.
Ompulisisye nga nkusaba.
2 Oganye esaala yange etuuke e gyoli ngʼokuduunya kwʼobubbaani,
nʼokusiirya engalo gyange omu kusaba kubbe ngʼesadaaka eyʼakanaigulo.
3 Oo Musengwa, ofuge entumula yange,
ombuuneku omunwa gwange.
4 Tiwaganya omwoyo gwange ni gwegomba okukola ekibbikibbi kyonakyona,
tiwaguganya okwemigira omu bibbibibbi,
nʼomu mukumbo nʼabakola ebibbibibbi
era tiwaganyanga ni nabeegaitaku omu kulya embaga gyabwe.
5 Oganye omuntu omutuukirirye ambonereze, ekyo kintu ekyʼekisa;
oganye annenye, ekyo kirongoola ooti mafuta agebansukire oku mutwe.
Ekyo tinkigaana.
Neye esaala yange bulijo eyakanisya ebikole byʼabakola ebibbibibbi.
6 Abafugi baabwe balibadyaka okuzwa e ngulu okwibbaale eriwanvu,
awo ababbibabbi webalimanyira bati ebibonobyo Musengwa byʼamazima.
7 Awo balikoba bati, “Ngʼowebadaata era ni bakankadyaga eitakali,
batyo webalikankadyaga amagumba gaiswe oku mugo gwʼamagombe.”
8 Neye iwe Kibbumba, oMusengwa wange niiwe oguneesiga;
njirukira giri niiwe okunkuuma; tiwandeka ni nfa!
9 Ontaase emitego egibantegere,
era entuula ababbibabbi egibategere.
10 Oleke ababbibabbi bagwe omu ntuula abananyere egibategere,
neye nze nga neebitira mwidembe.