3
EZabbuli ya Dawudi oweyairukire omutaanewe Abbusalomu.
Esaala yʼamakeezi
1 Oo Musengwa, nga ndi nʼabalabe bangi!
Era bangi abansetukiraku okundwanisya.
2 Bangi abantumulaku bati,
“OKibbumba tiyamununule.”
3 Neye iwe Musengwa, niiwe engabo enkuuma.
Niiwe ompa obuwanguli, era niiwe onjiryamu amaani.
4 Nkungirira niiwe Musengwa okumbeera,
era onjiramu ngʼosinzirira oku lusozirwo olutukulye.
5 Nnambaala ni ngona era ni ndamuka,
olwʼokubba oMusengwa ankuuma.
6 Tintya enkumi nʼenkumi egyʼabalabe
abeneeruguulirirye okunnumba.
7 Oo Musengwa, osetuke,
Kibbumba wange, onnunule!
Okubbe abalabe bange bonabona oku masaya
obamulungulemu amaino.
8 Musengwa, niiwe onnunula eeri abalabe,
era niiwe owa abantubo enkabi.