5
Eeri akubbembera abembi. Ya mulere. EZabbuli ya Dawudi.
Okusaba oKibbumba obukuumi
1 Oo Musengwa, owulisisye ebinkusaba,
ofeeyo okukukenyera kwange.
2 Owulire nga nkwekungirira okumbeera,
olwʼokubba ndi kusaba niiwe
oKibbumba wange era oKabaka wange.
3 Oo Musengwa, amakeezi owulira eigono lyange.
Amakeezi nkusaba,
ni nkuumirira okunjiramu.
4 Oli Kibbumba atasangaalira obubbibubbi,
era akola ekibbikibbi tomwikirirya okubba aamo na iwe.
5 Abeekudumbalya tobaikirirya omumaisogo,
ocaawa bonabona abakola ebikole ebibbibibbi.
6 Ojigirica abo abatumula ebyobubbeyi.
OMusengwa acaawira nakimo
abaiti nʼababbeyi.
7 Neye nze, olwʼokutakakwo okutakoma,
naingiranga mu nyumbayo.
Nasinziranga mu Yeekaaluyo entukulye,
era ni nkotama okukuwa ekitiisya.
8 Oo Musengwa, onnungamye okukola ebikole ebyʼobutuukirirye
olwʼokubba ndi nʼabalabe, ondage nakusani enzirayo
egimba nkwate.
9 Abalabe bange ebibono ebibatumula tibyesigika,
ekibali oku myoyo ikwo kufafaagania.
Ebibono ebiwaana ebibatumula,
bifunya ooti kivundi ekizwa omu magombe agebaliikwire.
10 Oo Kibbumba, obasingisye omusango.
Oleke ibo abananyere bagwe omu mitego gyabwe.
Obabbinge omumaisogo olwʼebikole byabwe ebingi ebibbibibbi,
olwʼokubba bakujeemeire.
11 Neye oleke bonabona abairukira egyoli okubakuuma basangaalenge,
oleke bayembenge nʼeisangaalo bulijo.
Era obukuumibwo bubabbengeku,
awo-so abo bonabona abakutaka bajaagaanenge oku lulwo.
12 Ekyo kityo olwʼokubba, Musengwa, owa abatuukirirye enkabi.
Ekisaakyo kibakuuma ooti ngabo.