62
Eeri akubbembera abembi oYedusuni. EZabbuli ya Dawudi.
Okwesiga obukuumi bwa Kibbumba
1 Omwoyo gwange gusunira ekiwuumulo mu Kibbumba yenkani.
Obununuli bwange buzwa eeri niiye.
2 Niiye yenkani eibbaale lyange omu neebisa era omununuli wange.
Niiye olugaga lwange, era tinabbeerengeku nakimo nʼokutya.
3 Mwalituuca di inywe nywenanywena nga mulumba omuntu omoiza okumwita,
atakiraku ekitempe ekitaka okugwa amaani, ooba olukita oluvune?
4 Mutaka okumutoola oku bukulu.
Mukira kusangaalira bubbeyi.
Entumula yaanywe eraga okutakirya omuntu obusa,
neye ngʼomu myoyo gyanywe mumulaama.
5 Omwoyo gwange gusuna ekiwuumulo mu Kibbumba yenkani.
Eisuubi lyange lizwa eeri niiye.
6 Niiye yenkani eibbaale lyange omu neebisa era omununuli wange.
Niiye olugaga lwange, era naabbanga mucaati.
7 Obununuli bwange nʼekitiisya kyange bizwa eeri Kibbumba.
Niiye eibbaale lyange eryʼamaani omu neebisa, era niiye ekiirukiro kyange.
8 Bantu bange, mwesigenge oKibbumba nabuli kiseera.
Mumukoberenge niiye ebigosi byanywe byonabyona,
olwʼokubba niiye ekiirukiro kyaiswe.
9 Dala abantu mwota-bwota.
Nʼobwebabba bʼekitiisya, tibeesigika.
Owebabapima oku minzaani tibazitowa
era babba bawuuku okukiraku omwota.
10 Tiwesiganga eifuge,
era tiwesisiijanga olwʼebyo ebyonyagire.
Obusunibwo nʼowebweyongera obungi,
tobwesiganga.
11 OKibbumba atumwire omulundi gumo,
ni mpuliramu ebintu bibiri nti,
iwe Kibbumba oli wʼamaani,
12 era nti, iwe Musengwa oli wʼekisa.
Mazima walisasula nabuli muntu
kusinzirira ku mulimogwe.