63
EZabbuli ya Dawudi, oweyabbaire omwidungu omu Yuda.
Okutaka eino oKibbumba
1 Oo Kibbumba, niiwe oKibbumba wange,
nkunoonia nʼomwoyo gwange gwonagwona.
Obwomi bwange bukuli nyonta,
nʼomubiri gwange gukukandiire
ooti kyalo ekikalu ekikandiire,
amaizi.
2 Nkuboine omu Weemayo,
era ni mbona amaanigo nʼekitiisya.
3 Olwʼokubba okutakakwo okutakoma kukirira nakimo obwomi,
nakuwuujanga.
4 Nakwebalyanga nga nkaali ndi mwomi,
nakusabanga nga nsiirirye engalo gyange egyoli.
5 Omwoyo gwange gwanogananga ooti muntu aliire ekyokulya ekinoli,
era nayembanga nʼeisangaalo okukuwuuja.
6 Obwire bwonabwona oku buliri bwange,
nkwebukirya ni nkuseegaku.
7 Olwʼokubba niiwe obubbeeri bwange;
era nnyemba ni njaagaanira omu kiiriirye kyʼebiyayabyo.
8 Omwoyo gwange gukwevambaku
nʼompanirira nʼamaani agʼengaloyo endiiro.
9 Abakiiya okunjita balijigirika,
balyaba e magombe.
10 Balibaita nʼempiima,
ni basuuka kyokulya kyʼamakibbwe.
11 Neye okabaka yalijaagaana olwa Kibbumba.
Nabuli alayira oKibbumba, yamuwuujanga;
neye eminwa gyʼababbeyi bagibbuunangaku.