64
Eeri akubbembera abembi. EZabbuli ya Dawudi.
Esaala yʼobukuumi
Oo Kibbumba owulire okwezuluguma kwange.
Okuume obwomi bwange eeri entiisya yʼabalabe.
 
Onkuume eeri enkwe gyʼababbibabbi,
era ondamye eeri ekiziima kyʼababbibabbi abo.
 
Bakolesya endimi gyabwe ooti mpiima enjagalye,
era bakasuka ebibono ebikambwe ooti bulaso.
Beeteegera ni balasa oyo onambulaku omusango,
bamuvumbinkirirya ni bamulasa, nga tibatya.
 
Bagumyangana nga bategeka okukola obubbibubbi,
ni bateesa okutega emitego gyabwe mu kyama,
nga bakoba bati, “Naani-so eyagibona?”
Bateesa ekibbikibbi ni bakoba bati,
“Entegeka enu egitukolere, mpaawo ekyagikaisisya.”
Ebiseego byʼomuntu omunda omu mwoyogwe, mpaawo ayezya okubitegeera.
Neye oKibbumba yalibalasa nʼobulaso,
amangu ago ni bagwa ansi.
Ebibono byabwe ebibatumula byalibakangira
ni bibajigirica.
Bonabona abababona balitengeetya emitwe okubatala.
 
Abantu bonabona balitya
ni balangirira oKibbumba ebyakola,
era ni bafumintiriza kwebyo ebyakola.
10 Abatuukirirye bajaagaaniranga omu Musengwa,
era ni bairukira egyali okubakuuma.
Bonabona abalongoole omu myoyo bamuwuujanga.