65
Eeri akubbembera abembi. EZabbuli ya Dawudi. Olwembo.
Okuwuuja nʼokwebalya oKibbumba
1 Oo Kibbumba, osaanira okukuwuujanga omu Sayuuni
era twatuukiriryanga obweyamo bwaiswe egyoli.
2 Oo iwe owulira okusaba kwaiswe,
abantu bonabona baliiza egyoli.
3 Ebikole byaiswe ebibbibibbi nʼowebitubitiriraku,
iwe obitusoniya.
4 Wʼenkabi iye oyo ogwolonda
nʼomusemberya e gyoli okubbanga omu kifookyo ekitukulye.
Twaikutanga ebisa ebyʼomu nyumbayo,
ebyʼomu Yeekaaluyo entukulye.
5 Oo Kibbumba oMununuli waiswe,
otwiramu ngʼokola ebikole ebyʼobutuukirirye ebyentiisya.
Abantu bonabona oku kyalo
nʼabali oku manyanza agʼe yala bakwesiga niiwe.
6 Oli wʼamaani, era olwʼobwezyebwo
wateekere ensozi omu bifo byagyo.
7 Osirica okuwooga kwʼenyanza,
era okuwooga kwʼamayengo gaayo.
Osirica okwediima kwʼamawanga.
8 Abantu omu kyalo kyonakyona batya ebyewunyo ebyokola.
Obaizulya eisangaalo okuzwa amakeezi
okutuukira nakimo eigulo.
9 Olabirira ekyalo nʼokisukirira,
era nʼokijimuca ino.
Emiiga gya Kibbumba giizwiremu amaizi,
okuwa abantu ebimera,
olwʼokubba wategekere otyo ekyalo.
10 Obulime bwakyo obusukirira
amaizi mangi ni bugonda.
Eitakali olinyinyintirya oikendi
nʼowa ebirime byaku okubala.
11 Omwanka nʼogwigalawo nʼamakungula amangi,
nabuli gyobita ogalekawo mu bungi.
12 Ebiriisiryo ebyʼomwidungu bikubbaku ebisolo,
obusozi ni bwizulaku eisangaalo.
13 Ebiriisiryo biizwire biraalo,
nʼebiinamo biizwire ngaano.
Nabuli kintu kiceera era ni kyemba olwʼeisagaalo.