66
Eeri akubbembera abembi. EZabbuli ya Dawudi.
Olwembo oluwuuja oKibbumba
1 Ekyalo kyonakyona kiwuuje oKibbumba nʼeisangaalo.
2 Mwembe oku kitiisya kyʼeriinalye,
mumuwuuje omu ngeri emuwa ekitiisya.
3 Mukobe oKibbumba muti, “Ebyokola nga byewunyisya!
Olwʼobwezyebwo obwʼamaani,
abalabebo omu kutya banyolokoka omumaisogo.
4 Ekyalo kyonakyona kikusinza,
ni bemba okukuwuuja,
bemba okuwuuja eriinalyo.”
5 Mwize mubone oKibbumba ebyakola,
ebyewunyisya ebyo ebyakolera abantu.
6 Enyanza yagisuucirye lukalu,
ni bagibitamu na bigere.
Eeyo ni tujaagaana olwʼebiyakolere.
7 Afuga nʼobwezyebwe emirembe gyonagyona,
ateekere amaisoge oku banamawanga.
Aale abajeemu abo tibamwepankirangaku.
8 Muwuuje oKibbumba waiswe inywe amawanga gonagona,
era eigono lyanywe erimuwuuja liwulikikane.
9 Niiye atukuuma ni tusigala nga tuli boomi,
era taleka ni batuwangula.
10 Oo Kibbumba, watugezeserye,
watulongoire ngʼowebakola efeeza.
11 Watulekere ni tugwa omu mutego
nʼotutiika emigogolo egikaluba.
12 Walekere abalabe baiswe ni batwemyaga oku mitwe,
ni tubita omu musyo nʼomu maizi.
Neye watutuucirye omu kifo ekyokwesiima.
13 Naleetanga omu nyumbayo esadaaka egibooca yonayona.
Natuukiriryanga obweyamo bwange egyoli;
14 ebyo omunwa gwange ebigwabbutwire nʼebinasuubizire
owenabbereire omu bigosi.
15 Naawangayo egyoli esadaaka egibawaayo nga bagyoca yonayona, eyʼebisolo ebisava.
Ni mpaayo egyoli esadaaka egibawaayo nga bagyoca yonayona eyʼentaama ensaiza,
nʼente emasiniki nʼembuli.
16 Mwize muwulire inywe nywenanywena abatya oKibbumba,
nʼabakobera ebyankoleire.
17 Namwekungiriire okumbeera,
era ni nnyemba okumuwuuja.
18 Singa nabbaire mbisire ekibbikibbi omu mwoyo gwange,
oMusengwa tiyankumpuliire.
19 Neye dala oKibbumba ampuliire,
nʼawulisisya okusaba kwange.
20 OKibbumba bamuwuuje
olwʼokubba tagaine okusaba kwange,
ooba tantoireku okutakakwe okutakoma.