67
Eeri akubbembera abembi. Ebivuga ebyʼenkosi. EZabbuli.
Olwembo oluwuuja oKibbumba
1 Oo Kibbumba, otukwatire ekisa, era otuwe enkabi.
Otuloleku nʼamaiso agʼekisa,
2 kaisi ekyalo kyonakyona kimanye ebyotaka,
era amawanga gonagona gamanye ngʼowoonunula.
3 Oo Kibbumba, oleke abantu bakuwuuje,
oleke abantu bonabona bakuwuuje.
4 Oleke amawanga gasangaale era gayembe nʼeisangaalo,
olwʼokubba ofuga abantu omu bwenkanya,
era olungamya amawanga gonagona omu kyalo.
5 Oo Kibbumba, oleke abantu bakuwuuje,
oleke abantu bonabona bakuwuuje.
6 Ekyalo kibala ebineneka byakyo bingi,
oKibbumba, iye oKibbumba waiswe atuwaire enkabi.
7 OKibbumba atuwaire enkabi,
oleke abantu omu kyalo kyonakyona bamuwenge ekitiisya.