68
Eeri akubbembera abembi. EZabbuli ya Dawudi.
Amaani nʼekitiisya kya Kibbumba
1 Oleke oKibbumba asetuke, abalabebe basalaanike.
Oleke abo abamucaawa bamwiruke.
2 Ngʼompunga owaafuumuula omwosi,
wena woobba obafuumuule.
Ngʼodipoli owaasaanuuka omu musyo,
nʼababbibabbi webabba bajigirike omumaiso ga Kibbumba.
3 Neye oleke abo abatuukirirye basangaale,
era bajaagaane omumaiso ga Kibbumba,
oleke bajaagaane olwʼeisangaalo.
4 Mwembere oKibbumba, mwembe okuwuuja eriinalye.
Mumuwuuje iye oyo atambulira omu bireri.
Eriinalye niiye oMusengwa,
era mujaagaanire omumaisoge.
5 Niiye oiteeye wʼabafuubbi, era niiye omulwaniriri wʼabanamwandu,
iye oKibbumba abba omu kifookye ekitukulye.
6 OKibbumba awa abanambulaku abantu baabwe, ebisito.
Atoola abasibe omu mabbuusu, ni babba omwidembe.
Neye abajeemu babba mu kyalo ekikalu.
7 Oo Kibbumba, owewakubbembeire abantubo,
owewatambwire ngʼobita omwidungu,
8 ekyalo kyatengeetere,
eigulu ni lisusuca oikendi,
iwe oKibbumba wa Isirairi
owewabonekeire oku Sinaayi.
9 Oo Kibbumba, watoonyeserye oikendi mungi oku kyalo,
nʼoiryamu obujimu ekyalokyo okububwo ekyabbaire kinafuwire.
10 Abantubo ni batyama omwo,
era Kibbumba, olwʼobusaabwo obubitiriri, wagabiriire abadoobi ebibeetaaga.
11 OMusengwa yawaire ekiragiro,
abakali bangi ni basasya amawuliroge agati,
12 “Abakabaka nʼamaje gaabwe bairukire.
Abakali abasigala e ika niibo abagaba omunyago.
13 Newankubbaire nga basigala mu biraalo byʼentaama,
bali ooti mayaya ga njiiwa agebabiikireku efeeza,
ngʼamaviirige bagabiikireku ezaabbu enekaaneka.”
14 OKibbumba oWabwezye Bwonabwona oweyasalaanicirye abakabaka oku kyalo ekyo,
kyabbaire ooti bbalaafu agwire oku lusozi oZalumoni.
15 Olusozi oBbasani niirwo olusozi lwa Kibbumba,
olusozi oBbasani luwanvu.
16 Inywe ensozi empanvu, lwaki mugongera
olwʼolusozi oKibbumba oluyalondere iye okubbanga?
Dala oMusengwa, okwo kuyaabbanga emirembe gyonagyona.
17 OMusengwa azwa oku lusozi oSinaayi
nʼenkumi nʼenkumi gyʼebigaali byʼamaje,
nʼaiza omu Weemaye.
18 Owewaniinire oku lusozi oluwanvu,
watwaire abawambe bangi.
Abantu bakuwaire ebirabo bingi,
nga nʼabajeemu bona balimu,
Iwe Musengwa obbenge eeyo nʼabo.
19 OMusengwa bamuwuujenge, bawuujenge oKibbumba omununuli waiswe,
iye oyo atujejera nabuli lunaku.
20 OKibbumba waiswe niiye oKibbumba anunula,
iye aKira Byonabyona, oyo oMusengwa atulamya okufa.
21 Mazima oKibbumba yalitentena emitwe gyʼabalabebe,
nʼasusungula ebiyanga byʼabo abanyiikiira okubbenga.
22 OMusengwa akoba ati,
“Nalibairya okuzwa e Bbasani;
Nalibainululya omu lwabi lwʼenyanza,
23 kaisi inywe abantu bange mwezye okwemyaga omu musaaye gwabwe,
nʼembwa gyanywe ni gyesunira ekyokulya.”
24 Oo Kibbumba, abantu bakuboine nga weekubbembereimu mukumba olwʼobuwanguli,
iwe Kibbumba wange,
era oKabaka, ngʼoingira omu Weemayo.
25 Abembi beekubbembeire, abʼebivuga ni bazwaku e nyuma.
Aakati ni wabbaawo abaala, nga bakubba obugoma.
26 Muwuuje oKibbumba omu lukumbaana olunene.
Muwuuje oMusengwa omu nkumbaana gya Isirairi.
27 Ekika kya Bbenyamini ekisembayo obutono kibeekubbembeire,
ni kwiraku ekiziima kyʼabakungu abʼekika kya Yuda.
Ni kwiraku abakungu abʼekika kya Zebbulooni nʼekya Nafutaali.
28 Oo Kibbumba olage obwezyebwo,
otulage amaanigo ngʼowookolanga.
29 OlwʼeYeekaaluyo eri omu Yerusaalemi,
abakabaka bakuleeteranga ebirabo.
30 Okaawuukire ogusolo ogwo ogwʼomu bitooko,
era abantu abo abali ooti gamasiniki agali omu manyana.
Obaikaikanie bakuleetere efeeza.
Osalaanica amawanga ago agataka eino entalo.
31 Abakwenda balizwa e Misiri, nʼabantu bʼEsyopiya
balyewaayo eeri oKibbumba.
32 Mwembere oKibbumba inywe obwakabaka bwʼoku kyalo.
Mwembe okuwuuja oMusengwa.
33 Mwembere oyo atyama omwigulu, eryʼeira nʼeira.
Muwulire ngʼabbwatuka nʼeigonolye eryʼamaani.
34 Mulangirire obwezye bwa Kibbumba,
ekitiisyakye kiwoisya oIsirairi,
nʼobwezyebwe buli omwigulu.
35 OKibbumba nga wʼentiisya omu Weemaye!
OKibbumba wa Isirairi niiye awa abantube obwezye nʼamaani.
OKibbumba bamuwuujenge.