69
Eeri akubbembera abembi. Omu kuwooya kwʼebimuli. EZabbuli ya Dawudi.
Okukunga olwʼokutaka obubbeeri
1 Oo Kibbumba onnunule,
amataba gandi mu mamiro.
2 Njolomera omu lutente olwabiriri,
awabula obusinziriro.
Ndi mu lwabi,
amataba gammira.
3 Ndembere okukunga olwʼokutaka obubbeeri,
amamiro gankalire.
Amaiso gandoolere,
nga nkukuumiriire iwe Kibbumba wange okumbeera.
4 Abancaawa anambula nsonga,
bangi okukiraku enziiri gyʼoku mutwe gwange.
Abalabe bange bangi abancaawa anambula nsonga,
ibo banoonia kunjita,
bankaka nʼokwirya ebinandi ni njibba.
5 Oo Kibbumba, omaite obusirusiru bwange,
nʼebibbibibbi byange tibikwebisa.
6 Abo abakwesiga
tiwabaganya okuswaluka oku lwange,
Musengwa iwe oKibbumba oWabwezye Bwonabwona;
tiwaganya abo abakunoonia
okuswala oku lwange,
iwe oKibbumba wa Isirairi!
7 Ngumira ebizumi ebibanzuma oku lulwo,
era ni nswaluka.
8 Nsuukire ooti ndi munamawanga eeri abantu bange,
ooti ndi mugwira eeri abaana ba mama,
9 olwʼokubba okutaka eino enyumbayo kummalisyawo,
nʼabantu ebibakuduula, biira ku ninze.
10 Owenkunga, era ni nsiiba,
ekyo kyona kinzumisya.
11 Oweneesiba ebibenga olwʼenima,
nsuuka nseko gyabwe.
12 Abo abatyama oku mulyango gwʼekibuga bangeya,
era nsuukire lwembo lwʼabateemeere.
13 Neye nze neegairira niiwe Musengwa,
omu kiseera kyʼokusiimakwo,
nʼolwʼokutakakwo okutakoma,
Kibbumba onjiremu ngʼonnunula ngʼowewasuubizire.
14 Onnunule okuzwa omu lutente,
tiwaganya ni njolomera,
ontaase eeri abo abancaawa,
ontoole omu lwabi.
15 Tiwaganya amataba okummira,
ooba nze okweinika omu lwabi,
waire okwika e magombe.
16 Oo Musengwa onjiremu, olwʼokubba okutakakwo okutakoma kusa;
olwʼekisaakyo ofeeyo oku kusaba kwange.
17 Tiwakubbira omuweereryawo omugongo,
oyanguwe okunjiramu, olwʼokubba ndi mu bugosi.
18 Oigerere e gyendi onnunule,
ondamye abalabe bange.
19 Omaite ngʼowebanzuma, ngʼowebanswaza era ngʼowebanjerega.
Abalabe bange bonabona obabona.
20 Ebizumi byabwe binyolya omwoyo gwange,
era bimmaliremu amaani.
Nnoonerye ayezya okunsaasira ni nkayaku,
era nʼayezya okunjiryamu amaani nandi ni mmusuna.
21 Omu kyokulya kyange banteekeiremu ondulwe.
Enyonta oweyankwaite, bannywisirye nviinyo ensasaami.
22 Nʼolwekyo oleke ekiinulo kyabwe kibasuukire mutego.
Era eidembe eribalimu, libasuukire mupaasuka.
23 Oleke amaiso gaabwe gayofuwale bakaye okubona,
Era emigongo gyabwe gigodobale emirembe gyonagyona.
24 Obasukeku ekiruyikyo,
era obakambuwalire omu busungubwo obubitiriri.
25 Oleke enkambi gyabwe gisuuke kinameje.
Tiwaabbaawo muntu asigala omu weema gyabwe,
26 olwʼokubba bayiigaania oyo ogwobonerezere,
era bongera okulumya oyo ogwokangabairye.
27 Obavunaane musango ku musango
tiwabanunula naire.
28 Amaliina gaabwe bagasangule omu kitabo kyʼaboomi,
era tiwabawandiika aamo nʼabatuukirirye.
29 Neye nze ndi mu bugosi era ndi mu bulumi.
Oo Kibbumba onnunule era onsetule angulu.
30 Nawuujanga eriina lya Kibbumba omu lwembo,
namugulumalyanga nga mmwebalya.
31 Ekyo kyasangaalyanga oMusengwa,
okukiraku okumuwa onte omasiniki ooba okitobba nʼamaziga gaaku nʼebibbonge.
32 Abebagadya balibona ekyo, ni basangaala.
Ibo abanoonia oKibbumba baliiramu amaani.
33 OMusengwa awulisisya abo abadoobi,
era tiyeerabira abantube abasibe.
34 Oleke eigulu nʼekyalo bimuwuujenge,
era nʼenyanza nʼebyomi byonabyona ebigirimu,
35 olwʼokubba oKibbumba yalinunula oSayuuni,
nʼayombeka obuyaaka ebibuga bya Yuda.
Awo abantube balibba omwo, ekyalo ekyo ni kibba kyabwe.
36 Eibyaire lya baweereryabe lyalikisikira,
nʼabo abamutaka, balikityamamu.