7
EZabbuli ya Dawudi egiyembeire oMusengwa ngʼekwata oku Kuusi oMubbenyamini.
Okusaba kwa kukulamula omu bwenkanya
1 Oo Musengwa, iwe oKibbumba wange, njirukira eeri niiwe okunkuuma.
Onnunule era ondamye abo bonabona abanjiigaania,
2 aanambula ekyo bannyiiryagamu ngʼompologoma owaakola ekyayiigire,
bankutulyagamu nga mpaawo andamya.
3 Oo Musengwa, iwe oKibbumba wange,
obwemba nga nakolere ebintu binu: Nga nakolere ekikole ekibbikibbi,
4 ooba nkolere omukaagwa wange ekintu ekibbikibbi,
waire okulumya omulabe wange nga mpaawo nsonga,
5 kale oleke omulabe wange anjiige era ankwate.
Era oleke anjemyagire ansi okwitakali anjite, era andeke nga ngwire okwitakali nfiire.
6 Oo Musengwa osetukiremu, omu busungubwo olwanisye abalabe bange abannumba nʼobukambwe.
Oo Kibbumba wange osetuke, olagire wabbeewo obwenkanya.
7 Kale oleke abantu bonabona bakumbaane era bakweruguulirirye,
era obafuge ngʼosinzirira oku ntebeyo eyʼobwakabaka omwigulu.
8 Musengwa, niiwe alamula abantu bonabona. Oo Musengwa olamule omusango gwange nsinge,
olwʼokubba mpaawo kibbikibbi ekinkolere.
9 Oo Kibbumba omutuukirirye,
iwe akebera emyoyo nʼebiseego,
okomye abantu ababbibabbi okukola ebikole ebibbibibbi,
neye okuumenge abatuukirirye.
10 Kibbumba, niiwe engabo yange,
onunula abo abalongoole omu myoyo.
11 Kibbumba niiwe omulamuzi etiyeekubbira,
era bulijo abakola ebikole ebibbibibbi obasingisya omusango.
12 Singa tibacuuke ni beenenya,
oKibbumba ayaba okwagalya empiimaye,
era ategekere akalasoke.
13 Ategekere ebyokulwanisyabye ebiita,
yeetegekere okulasa obulasobwe obuliku omusyo empembi.
14 Obone ababbibabbi owebaseega okukola ekibbikibbi! Baizwire itima,
era batumula byobubbeyi.
15 Ekiina ekibakuulira abandi okukigwamu,
abananyere niibo abakigwamu.
16 Ebyeitima ebibakola bibairira niibo abananyere,
nʼebikole byabwe ebyobukambwe bibairira niibo abananyere.
17 Neebalyanga oMusengwa olwa bwenkanyabwe,
era nayembanga okuwuuja oMusengwa oNambulaku aMwagaagana.