71
Okwegairira kwʼomukaire
1 Oo Musengwa niiwe ekiirukiro kyange,
tiwandekanga ni nswala.
2 Omu butuukiriryebwo, ombeere era ontaase;
ontegere ekitwikyo era onnunule.
3 Obbe niiwe eibbaale lyange omu neebisa okusuna obukuumi bulijo;
olagire bannunule
olwʼokubba niiwe eibbaale lyange omu neebisa
era olugaga lwange.
4 Oo Kibbumba wange onnunule omu bwezye bwʼababbibabbi,
ontoole omu bwezye bwʼabakola ebibbibibbi era abaŋeŋese.
5 Oo oMusengwa iwe aKira Byonabyona, eisuubi lyange liri mu niiwe,
njabire nga neesiga niiwe okuzwera nakimo omu mavuvuka gange.
6 Okuzwa ngʼowebambyaire, niiwe omulabiriri wange.
Niiwe owantoire omu kida kya mama.
Nakuwuujanga bulijo.
7 Obwomi bwange bubbaire kyokuboneraku eeri abantu bangi,
olwʼokubba obbaire kiirukiro kyange ekyʼamaani ekinkuuma.
8 Nkuwuuja okumalaku olunaku
era nga wennangirira obukulubwo.
9 Tiwambinga nga nkayiriire,
tiwandekesula omu biseera amaani owegampweramu.
10 Abalabe bange bangeya,
abo abataka okunjita bateesera aamo.
11 Bakoba bati, “OKibbumba amulekeswire.
Tumuyiige tumukwate,
olwʼokubba mpaawo eyamutaasa.”
12 Oo Kibbumba, tiwamba yala.
Oo Kibbumba wange, oyanguwe okumbeera.
13 Nsaba nti abo abanvunaana baswale era bajigirike,
abo abataka okunkola akabbikabbi,
babasekerere era babanyoome.
14 Neye nze nʼasuubiranga bubbeeribwo bulijo,
neeyongeranga okukuwuuja.
15 Natumulanga oku bikolebyo ebyʼobutuukirirye
nʼoku kununulakwo okumalaku olunaku,
newankubbaire nga timpezya okubimalayo.
16 Oo Musengwa iwe aKira Byonabyona nalangiriranga bikole ebyokola.
Nalangiriranga butuukiriryebwo, obubwo iwe wenkani.
17 Oo Kibbumba, okuzwera nakimo omu mavuvuka gange wanjegeserye
era paka kuti nkaali ntumula oku bikolebyo ebyewunyisya.
18 Newankubbaire nga nkairiire ndi kinvinvi,
Kibbumba tiwandekesula,
paka owenamanyikisya abʼomugigi ogwiraku amaanigo,
nʼobwezyebwo eeri abo bonabona abaliirawo.
19 Oo Kibbumba, obutuukiriryebwo bugulumali okutuuka okwigulu,
iwe akolere ebikulu.
Oo Kibbumba, naani aali ooti niiwe?
20 Waire ondekere ni mba omu kugada okunene nʼomu bigosi ebingi
era waliiryawo obwomi bwange tete,
nʼontoola e magombe
nʼonsetula tete.
21 Walinnyongera ekitiisya,
era nʼongumya tete.
22 Nakuwuujanga nga nkukubbira otongoli,
olwʼokubba oli mwesigwa, Kibbumba wange.
Nayembanga okukuwuuja nga nkukubbira enkana.
Iwe oMutukulye Wenkani owa Isirairi.
23 Nabbookookanga olwʼeisangaalo
nga nnyemba okukuwuuja,
nze oguwanunwire.
24 Natumulanga oku bikolebyo ebyʼobutuukirirye
okumalaku olunaku,
olwʼokubba abataka okunkolaku akabbikabbi
obakwatisirye ensoni era nʼobaswaza.