72
EZabbuli ya Sulemaani.
Okusabira okabaka
1 Oo Kibbumba, oyegesye okabaka obwenkanyabwo,
era oyegesye omwana wa kabaka amazimago.
2 Awo yalamulanga abantubo mu mazima,
nʼabebagadya nʼabalamula mu bwenkanya.
3 Oleke ensozi gireetere abantu eidembe,
era obusozi bubaletere ebibala byʼobutuukirirye.
4 Oleke okabaka alwanirirenge abagada,
anunulenge abaana bʼabadamba,
era awangulenge abo ababajolonga.
5 Abantu bakuwenge ekitiisya emirembe gyonagyona,
paka eisana nʼomweri owebyalikomya okwaka.
6 Oganye obufugi bwa kabaka bugase abantu ngʼoikendi owaagasa emisiri,
bubbe ngʼoikeindi owaatoonya nʼasukirira ekyalo.
7 Oganye oku mulembegwe, abantu abatambulira omu butuukirirye beeyongere obungi,
era wabbeewo eidembe eribitiriri, paka omweri owegwalikomya okwaka.
8 Oganye afugenge okuzwera oku nyanza okutuuka oku nyanza egendi,
okuzwera oku mwiga Ewufulaate okutuuka ekyalo e gikikoma.
9 Amawanga agali omwidungu gakotamyenge emitwe gyabwe omumaisoge,
era abalabebe beeyalenge ansi omumaisoge.
10 Abakabaka bʼe Talusiisi nʼabʼoku bizinga
bamuleeterenge omusolo.
Abakabaka bʼe Syebba nʼabʼe Seebba
bamuleeterenge omusolo.
11 Abakabaka bonabona bakotamyenge emitwe gyabwe omumaisoge,
abantu abʼamawanga gonagona bamuweereryenge.
12 Ekyo kityo olwʼokubba anunula abadamba, ibo abamwekungirira,
abo abadoobi era abanambulaku obubbeeri.
13 Akwatira ekisa abanafu nʼabadamba,
anunula abadamba nandi ni bafa.
14 Abanunula eeri eifuge nʼeeri abababitya obundi,
olwʼokubba obwomi bwabwe bwʼebbeeyi ino egyali.
15 Okabaka awangaale!
Oleke bamuwenge ezaabbu okuzwa e Syebba.
Abantu bamusabirenge bulijo,
era bamusabirenge enkabi okumalaku olunaku.
16 Ekyalo ekyo kyonakyona kibbengemu ebyokulya ebibitiriri;
oleke bireremalenge oku nsozisozi okwo kwonakwona.
Oleke ekineneka kyamu kibbenge kijimu ooti kyʼomu Lebbanooni;
oleke kikule nakusani ooti isubi lyʼomu kigona.
17 Oganye eriina lya kabaka balyebukiryenge emirembe gyonagyona,
era lyeyongerenge okufuma paka eisana oweryalikomya okwaka.
Oganye abantu bonabona basunenge enkabi kubitira mu niiye.
Era bamwetenge wʼenkabi.
18 OMusengwa Iye oKibbumba wa Isirairi bamuwuujenge,
Iye yenkani akola ebyewunyisya.
19 Eriinalye eryʼentiisya baliwuujenge emirembe gyonagyona.
Ekyalo kyonakyona kiizule entiisyaye.
Amiina era Amiina.
20 Okusaba kwa Dawudi omutaane wa Yese kukoma yaawo.