EKITABO EKYOKUSATU
73
(Zab 73–89)
EZabbuli yʼAsafu.
OKibbumba wʼamazima
1 OKibbumba dala musa eeri oIsirairi,
eeri abo abʼemyoyo emirongoole.
2 Neye nze, nabbaire natira okuwaamu amaani,
okwikirirya kwange nga kusebengerera.
3 Ekyo kityo olwʼokubba abeekudumbalya bangongeirye,
owenaboine ngʼababbibabbi abo bali omu bwomi obusa.
4 Ababbibabbi mpaawo ekibadambya paka kufa,
emibiri gyabwe ginyirira era gyʼamaani.
5 Tibagada ngʼabantu abandi,
tibabba nʼebigosi ngʼabantu abandi.
6 Nʼolwekyo okwekudumbalya kwabwe tikwebisa ooti kajegere kʼomu mamiro,
ebikole byabwe ebyobukambwe byeraga ooti kizwalo.
7 Emyoyo gyabwe giizwire biseego ebibbibibbi,
basiiba mu kukola bubbibubbi.
8 Bajerega abantu, era babatumulaku kubbikubbi,
beepanka ni batiisyatiisya okumigirirya abandi.
9 Batumula kubbikubbi oku Kibbumba aali omwigulu,
era banyooma abantube oku kyalo.
10 Kagira abantu ba Kibbumba bagalukira egibali,
ni baikirirya nabuli kibakoba.
11 Era ababbibabbi abo ni beebuulya bati, “OKibbumba yamanya atya?
Dala oKibbumba oNambulaku aMwagaagana abitegeera?”
12 Kinu niikyo ababbibabbi ekibali,
babba nakusani bulijo, era nga beeyongera kugaigawala.
13 Olwo dala nteganiire bwereere okwekuuma nandi ni njonoona,
era ni neekuuma okutabbaaku omusango?
14 Ngada nabuli lunaku
era nabuli makeezi nsuna ebibonerezo.
15 Singa nabbaire ntumwire ntyo ooti babbibabbi,
nandibbaire mbeyere abantubo.
16 Owenakiseegereku nkitegeere,
kyambereire kigosi ino.
17 Paka owenaabire omu Weemayo,
awo ni ntegeera enkomerero yʼababbibabbi.
18 Dala obateeka omu bifo ebityereri,
obasindika omu kujigirika.
19 Bajigirikirawo,
bafeera mu nsisi ni baweerawo nakimo.
20 Ngʼekirooto owekigota oku muntu owaalamuka,
iwe Musengwa owewalisetuka,
batyo webaligota omu biseegobyo.
21 Omwoyo gwange owegwanakuwaliire,
era ni mpulira wundi,
22 nabbaire musirusiru era nga tintegeera;
nabbaire kinambulamu omumaisogo ooti kisolo.
23 Neye era mba kumpi na iwe bulijo,
era onkwatirira oku ngalo endiiro.
24 Onnuŋamya ngʼonjegesya,
era oluzwanyuma walinjaniriza omu kifo ekyʼekitiisya.
25 Naani ogundinaye omwigulu nga tiniiwe?
Niiwe oguneetaaga okukiraku ekintu kyonakyona oku kyalo.
26 Omubiri gwange nʼomwoyo gwange biyinza okubba binafu,
neye oKibbumba niiye amaani gʼomwoyo gwange
era niiye owange enaku gyonagyona.
27 Ibo abo ababba e yala na iwe bajigirika;
omalawo abo bonabona abatali beesigwa egyoli.
28 Neye nze nga kisa okubba okumpi nʼoKibbumba.
Nsuucirye oMusengwa aKira Byonabyona, kiirukiro kyange,
kaisi nkoberenge abantu byonabyona ebyakolere.