74
EZabbuli yʼAsafu.
Okusabira eigwanga
1 Oo Kibbumba, lwaki otulekesuliire nakimo?
Lwaki obusungubwo bumeigera oku ntaama gyʼomu kiriisiryokyo?
2 Oyebukirye abantubo abewagulire eira eino okubba ababo okububwo okuzwa eira nʼeira,
eigwanga eriwanunwire okubba eriryo okububwo.
Oyebukirye olusozi oSayuuni awabbaire obutyamibwo.
3 Olambuule obone ebijigirice,
omulabe ajigiricirye ebintu byonabyona, omu Weemayo.
4 Abalabebo bakubbiire olukero omu kifookyo e gitukusisinkanira,
ni bateekamu ebbendera gyabwe, okulaga bati bawangwire.
5 Beebitya ooti bantu abasiirya embaizi gyabwe
okutema emisaale omu kisaka.
6 Basusungwire ebijolije byonabyona ebibaize,
nga bakolesya embaizi nʼenyundo.
7 Bakumireku eWeemayo omusyo nʼeya nʼewaawo,
ni babebenyesya ekifo e gibakusinzira.
8 Bateesere bati, “Twabajigiricirya nakimo!”
Kale ni bayoca nabuli kifo omu kyalo e gibasinziranga oKibbumba.
9 Titukaali tubona obumanyiciryo bwʼebyewunyo,
mpaawo kadi naabbi aliwo.
Era kwiswe mpaawo kadi amaite ekyo owekyalikomera.
10 Oo Kibbumba, abalabe balituuca di okukujerega?
Eriinalyo balirizumirira emirembe gyonagyona?
11 Lwaki totubbeera nʼengaloyo, iyo endiiro eyʼobwezye?
Ogitooleyo e gyogiringiire omu kifubba obajigirice.
12 Neye iwe, Kibbumba niiwe oKabaka wange okuzwa eira nʼeira,
niiwe omununuli oku kyalo.
13 Niiwe owayawiiremu amaizi gʼenyanza ngʼokolesya amaanigo,
wasusungwire emitwe gyʼagampiri omu maizi.
14 Watentenere emitwe gyʼogumpiri ogwʼomu maizi,
nʼoguwaayo okubba kyokulya eeri ebibbumbe byʼomwidungu.
15 Niiwe owatemwire ensulo nʼemyala ni gikulumuca amaizi,
nʼokalya emiiga egyabbaire tigikalira.
16 Omusana nʼobwire bibyo,
wateekere eisana nʼomweri omu bifo byabyo.
17 Niiwe owateekerewo ensalo gyonagyona egyʼekyalo,
nʼoteekawo ebiseera byʼeibbugumu nʼebyʼobuwolondoki.
18 Oo Musengwa, oyebukirye engeri omulabe egyakujeregere,
nʼabasirusiru ngʼowebazumiriire eriinalyo.
19 Tiwaawaayo abantubo abanambulaku obubbeeri eeri abalabe baabwe abakambwe.
Abantubo abagada, tiwabeerabira emirembe gyonagyona.
20 Oyebukirye endagaano egiwakolere na iswe,
olwʼokubba ekyalo kiizwire ndikiirya na bikole byʼobukambwe.
21 Tiwaleka abebajolonga ni baswala,
oganye abadoobi nʼabadamba bagulumalyenge eriinalyo.
22 Oo Kibbumba, osetukiremu olwanirire ensongayo,
oyebukirye engeri abasirusiru egibakujerega okumalaku olunaku.
23 Tiweerabira ocerete wa balabebo,
okereere waabwe owa buli kiseera.