75
Eeri akubbembera abembi. Okwigono, “Tiwajigirica.” EZabbuli yʼAsafu. Olwembo.
OKibbumba niiye omulamuzi
1 Tukwebalya, Kibbumba,
tukwebalya olwʼokubba oli kumpi,
era abantu batumula oku byewunyobyo.
2 OKibbumba akoba ati, “Nalondere ekiseera ekinaliramuliramu,
era naliramula mu bwenkanya.
3 Ekyalo owekitengeeta nʼabantu bonabona abakirimu ni batukuta,
ninze ngumya empango gyakyo.
4 Nkoba abeepanka nti, ‘Mulekeraawo okwepanka.’
Nʼababbibabbi nti, ‘Mukomye okukubba ebifubba.
5 Timwakubbanga ebifubba,
waire okutumula nga mwepanka.’ ”
6 Okugulumalya tikuzwa buzwaisana, waire bugwaisana
waire mwidungu.
7 Neye oKibbumba niiye asalawo
okwica omuntu, nʼagulumalya ogondi.
8 OMusengwa akwaite ekikopo
ekiizwire enviinyo egifuukira ogyʼobusungubwe.
Agusukira ababbibabbi bonabona oku kyalo ni bagunywa,
ni bagumalirawo nakimo.
9 Neye nze, nalangiriranga ebyakolere emirembe gyonagyona,
nayembanga okuwuuja oKibbumba wa Yaakobbo.
10 Yalijigirica amaani gʼababbibabbi,
neye yalyongera agʼabatuukirirye.