76
Eeri akubbembera abembi. Egibembera oku bivuga ebyʼenkosi. EZabbuli yʼAsafu.
OKibbumba muwanguli
1 OKibbumba amanyikanire omu Yuda,
era eriinalye likulu omwIsirairi.
2 Eweemaye eri mu Yerusaalemi,
era abba ku Lusozi oSayuuni.
3 Eeyo niiyo e giyasinziriire nʼavunavuna obulaso bwʼabalabe obwita,
nʼengabo, nʼempiima, nʼebyokulwanisya byabwe ebindi ebyʼolutalo.
4 Oo Kibbumba, oli wʼekitiisya,
era wʼentiisya okukiraku ensozi enene egiriku ebisolo ebibayiiga.
5 Abalwani abʼamaani, byonabyona ebibabbaire nabyo babanyagireku,
era atyanu bafu.
Oku balwani abo,
mpaawo ayezya okusetula engalogye okulwana.
6 Oo Kibbumba wa Yaakobbo, owewabakaawukiire,
embalaasi nʼabagityamaku bagwire ni bafa!
7 Niiwe ogubali nʼokutyanga.
Naani ayezya okwemerera omumaisogo ngʼosunguwaire?
8 Wamanyikisirye ensalayo eyʼomusango ngʼosinzirira omwigulu,
ekyalo ni kitya era ni kisirika,
9 owewasetukire Kibbumba okusala omusango,
okununula abebagadya oku kyalo.
10 Dala obusungu bwʼabantu bwongera kukuweesya kitiisya.
Abo abawunuka obusungubwo kibaleetera kwegendereza.
11 Mukolenge obweyamo eeri oMusengwa iye oKibbumba waanywe,
era mubutuukiriryenge.
Abantu bonabona abʼamawanga agamweruguuliriirye baleete ebirabo, eeri Iye Oyo ogubali nʼokutya.
12 Aica abafugi,
era abakabaka bʼoku kyalo bamutya.